Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺MAer uwen heylighen was een ouergroot licht, Ende die stemmen van dese hoorden sij, maer sij en saghen hen figuere niet.

+ A

2

Ende om dat sij oock door die selue dinghen niet gheleden en hadden, soo maecten si v groot, ende die te voren ghequetst gheweest hadden dancten dat si niet ghequetst en worden, ende om datter een onderscheyt wesen soude, soo begheerden sij een gaue.

3

Waerom dat sij ghehadt hebben een columne des viers tot eenen leyder des ombekenden wechs, ende ghi verleende hen die sonne sonder hindere der goeder herberghen.

4

Sij waren voorwaer weerdich te deruen dat licht, ende te lijden den kerker der duysternissen, die v kinderen besloten hielden door die welcke dat ombedoruen licht des wets begonste der werelt ghegheuen te worden.

5

Doen sij dachten der rechtuerdigher cleyn kinderen te dooden, ende doender een kint te vondelinghe gheleydt was, ende verlost, tot haerder bescaemtheyt soo hebdy een menichte van haren kinderen wech ghenomen, ende ghy hebtse al te samen verdaen in een machtich water,

6

want dien nacht is te voren bekent gheweest van onsen vaderen, op dat sij warachtelijck wetende hoedanighen eeden si ghelooft hadden, beter te moede souden sijn.

7

⁺Ende van uwen volcke is voorwaer ontfaen die ghesontheyt der rechtuerdigher ende der onrechtuerdigher verderffenisse,

+ B

8

want ghelijck ghy onse teghenpartijders ghequetst hebt, alsoo hebdy ons verweckende groot ghemaect,

9

want die rechtuerdighe kinderen der goeder deden bedectelijc sacrificie, ende sij bescicten die wet der rechtuerdicheyt ter eendrachticheyt singhende louen den vader van alle dat die rechtuerdighe goede ende quade dinghen ghelijckelijc ontfanghen sullen.

10

Ende die ombequame stemme der vianden gaf groot wedergheluyt, ende

[p. *526]

daer worde ghehoort een iammerlijck ghecrijsch der weenender kinderen.

11

Ende met ghelijcker pijnen was die knecht met den Heere ghepijnicht, ende een ghemeyn mensch heeft ghelijcke dinghen gheleden als die coninck.

12

Hierom soo hadden sij ghelijckelijc allegader in eenen naem des doots ontellijcke veel dooden, want die leuende en waren niet ghenoech om die dooden te begrauen, want op eenen ooghenblic soo is hen alder edelste gheslachte vernielt,

13

Want doen sij van allen dien dinghen niet en gheloofden om die weldaden doen ierstmael die doodinghe der ierster gheborenen was, ⁺soo beloefden sij hen seluen Gods volck te sien.

+ C

14

Want doen die gheruste stillicheyt alle dinghen beuanghen hadde, ende den nacht in sijnen loop den haluen wech hadde,

15

soo is v almachtich woort springhende vanden hemel wt die coninclijcke stoelen, een hart bestrijder, voortsghespronghen int midden van die eerde der verderffenissen,

16

brenghende een scerp sweert v ongheueynst ghebodt, ende staende heuet al metter doot veruult, ende het ghenaecte totten hemel staende op die eerde.

17

Doen hebben hen ter stont die visioenen der quader droomen verbaest ghemaect, ende onuerwachte vreese sijn hen ouercomen

18

Ende die ander elders gheworpen half leuende, toonde om wat sake der doot dat hy sterf.

19

Want die visioenen die hen verstoorden vermaenden hen te voren van dese dinghen, dat sij niet en souden vergaen, niet wetende waerom dat sij dese quade dinghen leden.

20

Ende doen raecte die becoringhe des doots die rechtuerdighe oock, ende inder woestijne is een beroerte der menichten ghesciet, maer niet lange en bleef v gramscap.

21

Want een omberispelijc mensch haestelijc loopende om te bidden voor tvolck, voortbrenghende den scilt sijns diensts het ghebedt, ende door een welriekende offerande des biddens by brenghende, ⁺heeft wederstaen der gramscappen, ende der noot een eynde ghesteldt, toonende dattet v dienaer is.

+ D

22

Ende hy heeft die verstooringhen verwonnen niet door vromicheyt des lichaems noch door wapenen der macht maer metten woorde heeft hy hem tonderbracht die hem quelde, in ghedenckenisse verhalende die eeden der vaderen, ende dat verbont,

23

Want doen sij nv by hoopen deen op dander doot gheuallen waren, soo heeft hy tusschen beyde ghestaen, ende den oploop aff ghehouwen, ende heeft den wech afghesceyden die tot die leuende leydde.

24

Want in dat cleedt totten voeten dat hy hadde was den gheheelen omganck der eerden, ende die groote daden der ouders waren daer in vier rijen ghegraueert, ende v heerlijcheyt was in dat cieraet sijns hoofts ghescreuen.

25

Ende dese dinghen wijcte die vernielder, ende dese ontsach hy, want die proeue der gramscappen was alleen ghenoech.