Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

⁺ALLE wijsheyt is vanden Heere Godt, ende sij heeft met hem altijt gheweest, ende is voor alle tijden.

+ A

2

Wie heeft dat sandt der see, ende die druppelen des reghens, ende die daghen der werelt gheteldt? Wie heeft die hoocheit des hemels, ende die breetheyt der eerden ende die diepheydt des afgronts ghemeten?

3

wie heeft die wijsheyt Gods die voor alle dingen gaet doorsocht.

4

Dierste voor alle dingen is die wijsheyt ghescapen, ende tverstant der voorsienicheyt van tbegin des tijts.

5

Die fonteyn der wijsheyt is dwoort Gods int hooghe, ende haren inganc sijn die eewighe gheboden.

6

Wien is die wortel der wijsheyt ontdect, ende wie heeft haer listicheden bekent?

7

Wien is die onderwijsinghe der wijsheyt ontdect ende gheopenbaert ende wie heeft die vermenichfuldinghe van haren inganghen verstaen?

8

Een is die hoochste schepper almachtich, ⁺ende een machtich coninck ende bouen maten seer ontsienlijc, sittende op sijnen throon ende een heerscappende Godt.

+ B

9

Hy heeft die wijsheyt ghescapen inden heylighen gheest, ende hy heeftse ghesien, ende gheteldt ende ghemeten,

10

Ende hy heeft die ghestort op dat alle sijn wercken, ende ouer alle vleesch na sijn gaue, ende hy heeft die ghegheuen den ghenen die hem beminnen.

11

Die vreese des Heeren is glorie ende glorieringhe ende blijscap ende vruecht ende die croone des verhueghens.

12

Die vreese des Heeren sal therte ghenuechte aendoen, ende sij sal gheuen blijscap ende vruecht in die lancheyt der daghen.

13

Den ghenen die den Heere vreest sal wel sijn int wterste, ende inden dach sijns steruens sal hy ghebenedijt worden.

14

Die liefde Gods is een eerlijcke wijsheyt,

15

ende den welcken sij openbaert int ghesichte die beminnen haer door dat ghesichte, ende in die kennisse van haer grootdadicheden.

16

Tbeghinsel der wijsheyt is die vreese Godts, ende met die gheloouighe is sij in des moeders lichaem mede ghescapen, ende met die vercoren vrouwen wandelt sij, ende met die gheloouighe ende rechtuerdighe is si bekent.

17

⁺Die vreese des Heeren is een godtvruchticheyt der kennissen.

+ C

18

Die goduruchticheyt sal therte bewaren ende rechtuerdich maken, blijscap ende vruecht sal sij gheuen.

19

Den godtureesende salt wel sijn, ende in die daghen sijns eyndes sal hy ghebenedijt worden.

20

Die volcomenheyt der wijsheyt is God vreesen, ende die volheyt is van haer vruchten.

21

Sij sal veruullen alle sijn huys van gheslachten, ende die ontfanck plaetsen van haren scatten.

22

Die vreese des Heeren is een croone der wijsheyt veruullende den vrede, ende die vrucht der salicheyt,

23

ende hy heeftse ghesien, ende ghetelt, ende beyde sijnt Godts gauen.

24

Die wetenheyt ende tverstant der voorsienicheyt sal die wijsheyt tsamen wt deylen, ende die glorie der gheender die haer houden verheft sij.

25

Die wortel der wijsheyt is den Heere vreesen, want haer tacken sijn langhe leuende.

26

In die scatten der wijsheyt is tverstant, ende die godtvruchticheyt der wetenheyt, maer den sondaers is die wijsheyt een veruloeckinghe.

27

Die vreese des Heeren verdrijft die sonde,

28

want die sonder vreese is en mach niet rechtuerdich worden, ⁺want die gramschap van sijnder moedicheyt is sijn verderffenisse.

+ D

[p. *528]

29

Tot eenen tijt sal die lijdtsamighe verdraghen, ende namaels salt eenen wederloon der vrolijcheyt sijn.

30

Den goeden sin sal tot een tijt sijn woerden verborgen, ende die lippen van vele menschen sullen sijnen sin vertellen.

31

In die scatten der wijsheyt is een beteekenen der onderwijsinghen

32

ende den sondaer is een versmaetheyt den dienst Gods.

33

Sone begheerende wijsheyt onderhout die rechtuerdicheyt ende Godt sal v die gheuen.

34

Want wijsheyt ende gheleertheyt is die vreese des Heeren, ende dat hem welbehaecht

35

es tghelooue ende die saechtmoedicheyt, ende hy sal diens scatten veruullen.

36

En weest niet ongheloouich der vreesen des Heeren, noch en coemt tot hem niet met een dobbel herte.

37

En weest gheen gheueynst mensch in daenschijn der menschen, noch en wort niet verarghert in v lippen.

38

Merct daer op dat ghy bij auontueren niet en valt, ender uwer zielen gheen oneerlijcheyt en behaelt,

39

ende dat Godt v verholentheden openbaere, ende v neder stoote int midden der synagogen.

40

Want ghy sijt booselijck totten Heere ghegaen, ende v herte is vol bedrochs ende bedrieghelijcheyts.