Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺OM dese ende der ghelijcke dinghen hebben sij nae hen verdiente pijne gheleden ende sijn door die menichte der beesten verdreuen.

+ A

2

Voor welcke tormenten hebdy v volck wel bescict, den welcken ghy ghegheuen hebt die begheerte van hen wellusticheyt, hen eenen nieuwen smaec bereydende tot een spijse van quackelen.

3

Op dat voorwaer die ghene die de spijse begheerende waren (om die dinghen die hen ghetoont ende toeghesonden waren) oock souden vanden nootelijcken lust af ghekeert worden. Maer dese in corter tijt arm gheworden sijnde hebben nieuwe spijse ghesmaect,

4

want het moest wesen dat henlieden sonder ondersculdinghe die verderffenisse ouercomen soude, die tyrannie bedreuen, maer desen moest dit alleen ghetoont worden hoe dat hen vianden vernielt worden,

5

want doen desen ouer quam die wreede gramscap der beesten, soo worden sij door die beten der quader slanghen vernielt,

6

maer v gramscap en duerde niet inder eewicheyt, maer tot een castijnghe sijn sij eenen corten tijt verstoort gheweest, hebbende een teeken der salicheyt tot een ghedenckenisse van dat ghebodt uwer wet.

7

Want die bekeert was en worde niet ghenesen door tghene dat hy sach, maer door v den ghesontmaker van allen dinghen,

8

ende daer in hebdi onsen vianden oock ghetoont dat ghijt sijt die van alle quade verlost,

9

⁺want die hebben die beten der sprinchanen ende vlieghen ghedoot, ende daer en is gheen ghesontheyt haerder zielen gheuonden, want sij waren weerdich van sulcken dieren vernielt te worden.

+ B

10

Maer die tanden der venijnigher draken en hebben uwe kinderen niet verwonnen, want v bermherticheyt tot hen comende, ghenas die,

11

want in die ghedenckenisse van uwen woorden sijn si ondersocht, ende haestelijck worden sij ghesont ghemaect, op dat sij in een diepe verghetenheyt vallende niet en souden moghen ghebruycken uwer helpen,

12

want noch cruyt noch plaestere en ghenas hen, maer v woort Heere dat al ghesont maect,

13

want ghi Heere sijt die ghene die des leuens ende doots macht hebt, ende die tot die poorten des doots leyt ende wederom leydt.

14

Het is wel waer dat die mensche sijn ziele doot door quaetheyt, ende als den gheest wtgheghaen is, soo en sal hy niet wederkeeren, noch hy en sal die ziele niet wederom roepen die ontfanghen is,

15

maer uwe hant te ontulieden dats ommoghelijck,

16

want die ongoddelijcke loochenende v te kennen sijn door die stercheyt ws arms ghegheesselt met nieuwen wateren, ende met haghelen, ⁺ende reghenen hebben sij veruolghinghe gheleden, ende doort vier sijn sij vernielt,

+ C

17

want (dat seer wonderlijc was) int water dwelc alle dinck bluscht hadde tvier meerder cracht, want die werelt is een wreker der rechtuerdigher.

18

Want op eenen tijt soo werde dat vier ghestilt, dat die dieren niet en souden verbrant worden die totten ongoddelijcken ghesonden waren, maer om dat sij dit siende weten souden dat sij door Gods ordeel die veruolghinghe leden.

19

Ende op eenen tijt soo brande tvier bouen maten sterckelijkck int water van alle sijden, om dat vernielen soude die natie des quaden lants,

20

Voor welcke dinghen ghy v volck metter enghelen broot gheuoedt hebt, ende hebt hen broot vanden hemel bereyt ghegheuen, sonder arbeyt, alle wellusticheyt in sij seluen hebbende, ende sueticheyt van alle smake,

21

Want ghy toonde v rijckdom ende v sueticheyt die ghy tot v kinderen hebt, ende dit broot eens ieghelijcs

[p. *525]

wille dienende worde verkeert, waer toe dat een ieghelijc wilde.

22

Ende den sneeu ende dat ijs verdroeghen die cracht des viers, ⁺ende sij en versmolten niet, om dat sij weten souden dat het vier berrende inden haghel, ende blixemende inden reghen, die vruchten der vianden verderf.

+ D

23

Ende dat vier heeft wederom sijn cracht oock vergheten om dat die rechtuerdighe souden gheuoedt worden,

24

want die creatuere dienende v haren scepper, wort ontsteken tot pijnen teghen die onrechtuerdighe, ende het wort sachter om wel te doen voor die ghene die in v betrouwen.

25

Daerom doen ooc v creatueren in alle dinghen ghetransfigureert sijnde dienden uwer gratien der voedtsteren van alle menschen, ten wille der gheender die van v begheert sijn

26

om dat v kinderen die ghy Heere bemint hebt weten souden dat die vruchten der gheboorten die menschen niet en voeden, maer dat v woort onderhout die ghene die in v gheloouen.

27

Want dat vanden viere niet en mocht vernielt worden, verdwijnde ter stont alst van een cleyn strale der sonne verwermt worde.

28

Om dat eenen ieghelijcken kenlijc soude wesen datmen moet die sonne voor comen om v te ghebenedijden, ende v ten opganck des lichts te aenbidden,

29

want tghelooue vanden ondancbaren sal ghelijc wintersch ijs versmelten, ende sal vergaen als onnut water.