Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺MAer ghy onse Godt sijt suet ende warachtich, lijdtsamich ende met bermherticheyt alle dinghen bescickende,

+ A

2

want voorwaer eest dat wij sondighen wij sijn uwe, wetende v grootheyt ende eest dat wij niet en sondighen, soo weten wij dat wij by v gherekent sijn,

3

want v te kennen is een volcomen rechtuerdicheyt ende te weten v rechtuerdicheyt ende v macht dat is een wortel der onsterffelijcheyt,

4

want ons en heeft in dolinghe niet gebracht die versierde quade conste der menschen noch die scaduwe der scilderien arbeit sonder profijt, een gelijckenisse ghesneden door versceyden verwen,

5

welcs aensien gheeft den onuerstandighen begheerte, ende hy bemint die ghelijckenisse van een doodt beelt sonder ziele.

6

Die liefhebbers der quaetheden sijn weerdich des doodts die hope hebben in sulcke, ⁺ende diese maken, ende diese lief hebben, ende diese dienen.

+ B

7

Oock mede een potbacker druckende morwe eerde, maect arbeydelijck tot onsen orbaeren alderhande vaten, ende vander seluer potaerden maect hy vaten die suyuer sijn ten ghebruycke, ende desghelijcks oock die desen contrarie sijn, ende wat het ghebruyck is van desen vaten, daer is die potbacker een rechter aff.

8

Ende hy maect met ydelen arbeyt eenen godt vander seluer slijmigher eerden, hy die te voren van der eerden ghemaect was, ende nae een luttelken hem wederom derwaerts keert daer hy aff ghenomen is, als van hem gheeyscht wordt die scult der zielen die hy schuldich was.

9

Ende hy is besorght, niet om dat hy arbeyden moet, noch oock niet om dat sijn leuen cort is, maer hy strijdt tseghen die goutsmeden ende siluersmeden, ⁺ende volcht ooc nae die metael ghieters, ende heeft oock glorie om dat hy onnutte dinghen versiert.

+ C

10

Sijn herte is asschen ende onnutte eerde is sijn hope, ende snooder dan slijmeghe eerde is sijn leuen,

11

want hy en heeft niet ghekent den ghenen die hem ghescapen heeft, ende die hem ingheblasen heeft die ziele die werct, ende die hem den leuenden gheest ingheblasen heeft.

12

Maer si hebben oock ons leuen ghemeynt te sijne een spel, ende dat die conuersatie des leuens ghemaect is ter winninghen, ende datmen moet allesins ende oock van tquaet winninghe doen,

13

want dese weet dat hy bouen al misdoet die wt die materie der eerden broossche vaten, ende wtghesneden beelden maect.

14

Maer die hoouerdighe vianden ws volcs ende ghebodt ouer hen hebbende sijn alle onwijse ende bouen maten onsalighe zielen,

15

want sij hebben alle die afgoden der natien voor goden gheacht, die welcke noch ghesicht der ooghen en hebben om te sien, ⁺noch nuesgaten om adem te trecken, noch ooren om te hooren, noch vingheren der handen om te tasten, ende hen voeten sijn oock traech om te wandelen,

+ D

16

want een mensch heeftse ghemaect, ende die den gheest ontleent heeft die heeftse versiert, want gheen mensch en mach eenen Godt maken sijns ghelijc,

17

Want aenghesien dat hy steruelijc is soo scept hy eenen dooden met boose handen, want hy is beter dan dese die hy dient, want hy heeft emmer gheleeft al was hy steruelijck, maer dese en leefden noeyt.

18

Oock soo dienen sij die alder catijuichste dieren, want onuerstandighe by dese gheleken sijn noch argher dan die.

19

Ende ooc niemant en can metten ghesichte eenighe van desen dieren voor goet ghesien, want sij sijn den lof Gods ende sijnder benedictien ontgaen.