Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺O Hoe goet ende suet is Heere uwen gheest in alle dinghen?

+ A

2

Ende daerom straefdi die ghene die buyten die palen dolen, ende ghy vermaentse van tghene daer sij in sondighen ende ghy spreectse aen, op dat sij die quaetheyt latende souden in v gheloouen Heere,

3

want die oude inwoonders ws heylichs lants die ghy veronwaerdicht hebt,

4

want sij deden wercken die van v ghehaet sijn door toouerien, ende onrechtuerdighe sacrificien,

5

ende haerder kinderen dooders sonder bermherticheyt ende eters vander menschen inghewant, ende bloetsuypers, van dmiddel uwer verholentheyt,

6

ende ouders voortbrenghers der zielen die sonder hulpe sijn, hebdi willen verderuen door die macht van onsen ouders,

7

op dat si ontfanghen souden dat weerdich lant der pelgrimagien van Gods kinderen, welc lant v dalder waertste is bouen alle landen,

8

Maer dese als menschen hebdi ooc ghespaert, ende hebt ghesonden als voorloopers ws heyrs wespen, ⁺dat sij die allenxkens souden verdrijuen,

+ B

9

Niet dat ghy ommachtich waert in die orlooghe die ongoddelijcke onder die rechtuerdighe te worpen, oft door wreede beesten, oft door een hart woort die tsamen te verderuen,

10

maer by deelen ordeelende gaefdi hen tijt om penitencie te doen, wel wetende dat hen natie boos is, ende hen quaetheyt natuerlijc, ende dat hen ghedachte niet en mocht verandert worden inder eewicheyt

11

want het was een vermalendijt saet vanden beghinsel, ende niemant vreesende, aldus gaeft ghy ghenade haren sonden.

12

Want wie sal v segghen, wat hebdi ghedaen? oft wie sal teghen v ordeel staen? oft wie sal voor v aensicht comen wreker der booser menschen? oft wie salt v wijten eest dat die natien vergaen die ghi ghemaect hebt

13

want daer en is anders gheen God dan ghi die welcke sorghe hebt van allen dinghen om dat ghi thoonen soudt dat ghy niet onrechtuerdelijc dat ordeel en vonnist.

14

Noch coninc noch tyran en sal in v aenschijn eenich ondersoec doen van die ghene die ghy verdoruen hebt.

15

Daerom want ghy rechtuerdich sijt soo bescicti alle dinghen rechtuerdelijc, ende ooc te verdoemen den ghenen die niet en moet ghepijnicht sijn, dat houdt ghy vreemt van uwer macht,

16

⁺Want v cracht is een beghinsel der rechtuaerdicheyt, ende om dat ghi alder dinghen Heere sijt, daerom doedi v seluen hen allen sparen.

+ C

17

Ende ghy thoont v cracht die niet en wort ghelooft volcomen te sijne in crachte, ende die stouticheyt der gheender die v niet en kennen brengt ghy int openbare,

18

Maer ghy heerscapper der macht, ordeelt met stillicheyt, ende met grooter eerweerdicheyt bescicti ons, want het is in v te vermoghen als ghy wilt.

19

Ende ghy hebt v volc gheleert door sulcke wercken, datmen behoort rechtuerdich te sijne ende goedertieren, ende ghy hebt v kinderen ghemaect van goeder hopen, want ordeelende gheefdi in die sonden plaetse der penitencien,

20

want eest dat ghi uwer dienaren vianden, ende die der doot sculdich waren met sulcke matelijcheyt ghepijnicht hebt, ende verlost, gheuende tijt ende plaetse door die welcke sij mochten verandert worden van hen quaetheyt,

21

met wat grooter neersticheyt hebdy dan v kinderen gheordeelt, der welcker ouders ghi hebt ghegheuen eeden ende verbonden van goeden beloften?

22

Daerom als ghy ons een castijnghe gheeft, soo gheesselt ghy onse vianden in veel manieren, dat wij v goetheyt dencken souden ordeelende, ⁺ende dat wij (als van ons recht ghedaen wort) souden hopen v bermherticheyt.

+ D

23

Daerom den ghenen die in hen leuen onuerstandelijck ende onrechtuerdelijck gheleeft hebben, door die dinghen die sij ghedient hebben, hebt ghy hen ghegheuen die meeste tormenten,

24

Want voorwaer sij hebben in den wech der dolinghen te langhe ghedoelt, houdende sulcke voor goden die onder die dieren onnutte sijn, leuende ghelijck onuerstandighe, sprakeloose kinderen.

25

Daer om hebdy hen ghelijck kinderen sonder verstant, het ordeel ter bespottinghen ghegheuen,

26

Maer die door gheen bespottinghen ende straffinghen ghebetert en sijn, hebben Gods weerdich ordeel geproeft want in dese dinghen die si leden verdroeghen sijt noode.

27

Door die welcke sij lijdende hen verbolghen, door die dinghen die sij meynden Goden te sijne, siende in die selue doen sij verdoruen worden den ghenen die sij voortijts loochende te kennen hebben sij hem bekent warachtich Godt te sijne, waerom dat het eynde van hen verdoemenisse op henlieden comen sal.