Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺SY heeft hen wercken ghespoet in die handen vanden heylighen propheet.

+ A

2

Sij hebben ghereyst door die woestijnen die niet bewoont en waren, ende in verlaten plaetsen hebben sij hutten ghesteldt.

3

Sij hebben ghestaen teghen die vianden ende van haren vianden hebben sij hen seluen ghewroken.

4

Sij hebben dorst ghehadt ende v aengheroepen, ende hen is water ghegheuen van een seer hooghe steenrootse, ende een boete des dorsts wt eenen harden steen,

5

want door die dinghen daer hen vianden pijne af gheleden hebben, van ghebrec haers drancs sijn die kinderen van Israhel verblijt als sij des oueruloedelijc hadden.

6

Door dese dinghen (doen sij dien ghebraken) soo eest wel met hen gheschiet,

7

want voorwaer voor die fonteyne des eewighen vloets, hebdi den onrechtuerdighen bloet der menschen ghegheuen.

8

⁺Die welcke als sij ghemindert worden, doort ouer leueren van die ghedoodde kinderen, soo hebdi hem oueruloedich water ghegheuen onuerhoets,

+ B

9

toonende door den dorst die doen was, hoe dat ghy die uwe verhieft, ende hen wederpartijden doodet,

10

want doen sij gheproeft waren, ende sij voorwaer door bermherticheyt ontfanghen hadden die castijnghe, soo hebben si gheweten hoe dat die ongoddelijcke door die gramscappe ghedoemt tormenten leden,

11

Dese hebdi voorwaer aldus ghelijck een vader vermanende gheproeft, maer die hebdi als een straf coninck ondervraghende verdoemt,

12

want die niet teghenwoordich en waren, ende die teghenwoordich waren worden ghelijckelijc ghepijnicht,

13

want hen hadde tweederhande verdriet beuanghen, ende suchtinghe met ghedenckenisse der voorleder dinghen,

14

Want doen sij hoorden dat door hen tormenten wel met hen ghinck, soo hebben sij des Heeren ghedachtich gheweest verwonderende hen totten eynde des wtgancs,

15

⁺want den ghenen dien sij door die quade wtlegghinghe verworpen sijnde, beghect hadden, hebben sij ten eynde vander ghesciedenisse wonderlijck ghepresen, desghelijcks niet doende den rechtuerdighen,

+ C

16

maer voor hen onwijse ghedachten waren hen boosheden, dat die sommighe dolende dienden den stommen serpenten, ende onnutte beesten so hebdy op hen gesonden een menichte der stommer beesten ter wraken,

17

dat sij weten souden dat door die dinghen daer iemant mede sondicht door tselue hy oock ghepijnicht wort,

18

want v almachtighe hant die ghescapen heeft den omganc der eerden wt een onsienlijcke materie en was niet ommachtich onder hen te seynden een menichte van beyren, oft stoute leeuwen,

19

oft beesten van vreemder aert, vol gramscappen, oft ombekende beesten, oft die eenen vierighen adem wtblaesden oft eenen rueck des roocks voortbrenghende, ⁺oft grouwelijcke voncken wt haren ooghen worpende

+ D

20

der welcker quetsinghe hen niet alleen en hadde moghen verderuen, maer het aensien haddese door vreese oock moghen dooden,

21

Maer ooc sonder dese had-

[p. *522]

den sij met eenen wint moghen ghedoot worden, veruolghinghe gheleden hebbende van haren wercken ende verstroeyt sijnde door den gheest uwer cracht, maer ghy hebbet al in ghetale, ende ghewichte, ende mate ghescict,

22

want altijt blijft v alleen veel te vermoghen, ende wie soude moghen wederstaen der cracht ws arms?

23

Want ghelijck dat minste der waghen alsoo is voor v den omganck der eerden, ende ghelijck een druppel daws inden morghenstont, die op deerde gheuallen is,

24

Maer ghi ontfermt alder menschen, want ghy vermoghet alle dinghen, ende ghy ghelaet v der menschen sonden niet te sien, om die penitencie wille,

25

want ghy bemint alle die dinghen die sijn, ende ghy en haet niet van alle dat ghy ghescapen hebt, want hatende en hebt ghi niet ghestelt oft ghemaect,

26

hoe soude iet moghen blijuen en hadde ghy dat niet ghewilt? oft hoe soude tghene dat van v niet ghenoemt en ware behouden worden,

27

Maer ghy spaert alle dinghen, want sij uwe sijn Heere, die de zielen bemint.