Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel

1

⁺DEse wijsheyt heeft hem bewaert die dierste van Godt ghemaect was een vader van den omganck der eerden doen hy alleen ghescapen was,

+ A

2

ende sij leyde hem wt sijnder misdaet, ende gaf hem macht om alle dinghen onderdanich te houdene,

3

doen die onrechtuerdighe van deser wech ghinc in sijn gramscap, soo is door die gramscap des dootslachs die broederlijcheyt vergaen.

4

Daeromme doen dwater die eerde verdorf, so heeftse die wijsheyt wederom ghenesen, regerende door een versmadelijc hout den rechtuerdighen.

5

Dese ooc in die eendrachticheyt der hoouerdien doen die natien hem verhauen hadden, heeft ghekent den rechtuerdighen, ende dien Gode bewaert sonder clachte, ende in die kinderen heeft sij een stercke bermherticheyt bewaert.

6

Dese heeft den rechtuerdighen verlost vliedende van die vergaende ongoddelijcke, ⁺doen tvier neder viel op die vijf steden,

+ B

7

den welcken tot een ghetuyghenisse der boosheyt blijft staende een rookende woest lant, ende boomen die ten onsekeren tijden vruchten hebben, ende een ghedenckenisse van die ongheloouighe ziele een staende soutsteens beelt.

8

Want die de wijsheyt verlaten, en hebben niet alleen daer in ghedwaelt dat sij die goede dinghen niet en wisten, maer sij hebben van haerder onwijsheyt den menschen oock een ghedenckenisse ghelaten, alsoo dat sij in die dinghen daer sij door ghesondicht hadden, niet en mochten verborghen blijuen,

9

Maer die wijsheyt heeftse vander pijnen verlost die haer waer namen.

10

Dese heeft ooc den rechtuerdighen voor sijns broeders gramscap vliedende gheleyt door rechte weghen, ende heeft hem ghetoont dat rijck Gods, ende hem ghegheuen die kennisse der heylighen, si heeft hem eerlijc ghemaect in die arbeyden, ⁺ende sijn arbeyden volbracht.

+ C

11

Int bedroch der gheender die hem bedroghen, heeft sij hem by ghestaen, ende heeft hem eerlijc gemaect.

12

Sij heeft hem bewaert van die vianden, ende van die verleyders heeft si hem bescermt, ende eenen stercken strijdt heeft sij hem ghegheuen, dat hy verwinnen soude, ende weten dat die wijsheyt bouen al dalder machtichste is.

13

Dese en heeft den vercochten rechtuerdighen niet verlaten, maer vanden sondaren heeft sij dien verlost, ende sij is met hem nederghedaelt inden cuyle,

14

ende in die banden en heeft sij hem niet verlaten, tot dat sij tot hem brocht den scepter des rijcs, ende machticheyt teghen die ghene die hem verdructen, ende hy heeftse loghenachtich ghetoont die hem leelijclijck besculdicht hadden, ende sij heeft hem ghegheuen een eewighe claerheyt.

15

⁺Dese heeft dat rechtuerdich volc ende het omberispelijc saet verlost van die natien die dat verdructen,

+ D

16

Sij is comen int herte van Godts dienaer, ende heeft ghestaen voor veruaerlijcke coninghen, door wonder wercken ende teekenen.

17

Ende sij heeft die rechtuerdighe weder ghegheuen den loon van haren arbeydt, ende die gheleydt in eenen wonderlijcken wech, ende sij heeft dien gheweest tot een bedecsel des daechs, ende tot een licht der sterren des nachts,

18

ende si heeftse ouerghebracht door die roode zee, ende gheuoert door een seer groot water,

19

maer hen vianden heeft sij in die zee verdroncken, ende wt die diepte der hellen heeft sij henlieden wtgheleydt. Daerom hebben die rechtuerdighe wech ghenomen die roouen der ongoddelijcker,

20

ende sij hebben ghesonghen Heere uwen heylighen naem, ende v victorieuse hant loefden sij te samen,

21

want die wijsheyt hadde open ghedaen der stommen mont, ende die tonghen der gheender die niet spreken en conden heeft sij welsprekende ghemaect.