Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ICk ben voorwaer oock een sterffelijc mensch allen menschen ghelijck, ende wten eertschen gheslachte des gheens die ierst gemaect was

+ A

2

ende in mijns moeders lichaem tot vleesch gefigureert ende binnen den tijt van thien maenden ben ick gheronnen gheweest int bloet van eens menschen sade, ende door bequamen lust des slaeps,

3

Ende ick gheboren sijnde heb ontfanghen die ghemeyn locht, ende ick viel ooc neder op die ghelijckelijcke gemaecte eerde, ende dierste stemme heb ick wtghelaten weenende ghelijc sij alle,

4

ende in wendeldoecken ben ick opgeuoedt, ende in grooter sorghen,

5

want niemant vanden coninghen en heeft ander beghinsel van gheboorten ghehadt,

6

Aldus soo hebben alle menschen eenen inganck totten leuen, ende eenen ghelijcken wtganck.

7

Daerom heb ict begheert ende my is verstant ghegheuen, ende ic heb aengheroepen, ende in my is comen den gheest der wijsheyt,

8

ende ick heb die gheacht meer dan conincrijcken ende coninclijcke stoelen, ende die rijckdommen heb ick gheacht niet te wesen in haren ghelijcken,

9

⁺Ic en heb oock by haer niet gheleken eenighen costelijcken steen, want alle tgout by haer gheleken en is maer een luttelken sandts, ende als slijck sal tsiluer gheacht worden in haer aenscouwen.

+ B

10

Bouen die ghesontheyt ende scoonheyt heb ic die lief ghehadt ende heb voor my ghenomen die te hebben voor een licht want haer licht en is niet wtblusschelijc,

11

Ende alle goet is my comen tsamen met haer, ende ontellijcke eersaemheyt door haer handen,

12

ende ick heb blijde gheweest in alle dinghen, want dese wijsheyt ghinck voor my, ende ick en wist niet dat sij van alle dese dinghen een moeder was.

13

Die welcke ick sonder gheueynstheyt gheleert hebbe, ende die ic sonder ongonsticheyt ghemeyn make, ende haer eerlijcheyt en verberghe ic niet,

14

want si is eenen oneyndelijcken scadt den menschen, Wie dien scadt gebruyct hebben die sijn der vrintscappen Godts deelachtich worden, om die gauen der onderwijsinghen ghepresen sijnde,

15

Maer my heeft Godt ghegeuen wijselijck te spreken, ende te derren dinghen die weerdich sijn des gheens dat my ghegeuen wort, ⁺want hy is een leydtsman der wijsheyt ende der wijser menschen verbeteraer,

+ C

16

want in sijn hant sijn wij oock ende onse woorden ende alle wijsheyt, ende die onderwijsinge van die kennisse der wercken,

17

want hy heeft my ghegheuen, van dese dinghen die sijn, warachtighe kennisse, dat ick wete die ghesteltheyt vanden omganc der eerden, ende die crachten der elementen,

18

het beghinsel, ende het eynde ende dat middele der tijden, die veranderinghen van die achteruolghinghen, ende die voleyndinghen der tijden, die veranderinghe van die manieren, ende die deylinghe der tijden,

19

den loop des iaers ende der sterren ghescictheyt,

20

die natueren der dieren, ende die gramscappen der beesten, die cracht der winden, ende die ghedachten der menschen, die versceydenheyt der spruyten, ende die cracht der wortelen,

21

ende alle die dinghen die verborghen sijn ende te voren niet ghemerct, heb ick gheleert, want die wijheyt die welcke is een constighe makersse van alle dinghen heuet my gheleert,

22

Want in haer is den gheest des verstants heylich, eenich, menigherande, subtijl, welsprekende ruerlijck, ombesmet, seker, suet, tgoet liefhebbende,

[p. *520]

scerp, ⁺die niet en verbiet wel te doen,

+ D

23

vrindelijc, goedertieren, ghestadich, seker, ombesorgt, alle duecht hebbende, alle dinghen voorsiende, ende die alle gheesten begrijpt, verstandelijc, suyuer, subtijl,

24

want boven alle beruerlijcke dinghen is die wijsheyt dalder beruerlijckste, ende sij reyct ouer al om haer suyuerheyt wille,

25

want het is eenen domp der cracht Gods, ende sij is een sonderlinghe reyne wtuloedinghe van die claerheyt des almoghenden Godts, ende daer om en coemt in haer niet dat besmedt is,

26

want sij is een blinckende schijnsel des eewighen lichts, ende eenen spiegel sonder vlecke van Gods maiesteyt, ende een beelt sijnder goetheyt,

27

ende midts dat sij een is, vermach sij alle dinghen, ende in haer seluen blijuende vernieuwet sij alle dinghen, ende door die gheslachten draecht sij haer seluen ouer in die heylighe zielen, die vrinden Gods ende die propheten stelt sij,

28

Want niemanden en bemint Godt, dan den ghenen die metter wijsheyt inwoont,

29

want dese is schoonder dan die sonne, ende bouen alle die ghescictheyt der sterren, by den lichte gheleken wort sij beter beuonden,

30

want den lichte volcht den nacht, maer die quaetheyt en verwint die wijsheyt niet.