Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺BEter is wijsheyt dan cracht, ende een wijs man dan een sterc man,

+ A

2

daerom hoort ghi coninghen ende verstaet, leert ghy rechters van die eynden der eerden.

3

Gheeft v ooren ghy die de menichten in v bedwanc hebt, ende v seluen behaecht in die scaren der natien,

4

want vanden Heere is die macht v lieden ghegheuen, ende die cracht vanden alderhoochsten, die welcke onderuraghen sal v wercken, ende v ghedachten ondersoecken,

5

want doen ghi dienaers waert van sijnen rijcke, soo en hebt ghy niet rechtelijc gheordeelt noch bewaert die wet der rechtuerdicheyt, noch ghi en hebt nae Gods wille niet ghewandelt.

6

Veruaerlijck ende haestelijc sal hi hem v lieden vertoonen, want dalder hartste ordeel sal gheschieden ouer die ghene die ouerste sijn,

7

want den cleynen wort bermherticheyt verleent, maer die machtighe sullen machtelijc pijnen lijden.

8

⁺Want Godt en sal niemants persoon wtnemen, noch hy en sal niemants grootheyt ontsien, want den cleynen ende den grooten heeft hy ghemaect, ende hy heeft ghelijckelijc sorghe van allegader

+ B

9

maer den stercken is aenstaende stercker pijninghe.

10

Hierom tot v ghy coninghen sijn dese mijn woorden op dat ghi wijsheyt soudt leeren ende dat ghi daer niet wt en valt,

11

want wie die rechtuerdicheyt bewaren, die sullen rechtuerdelijc gheordeelt worden, ende wie rechtuerdighe dinghen gheleert sullen hebben, die sullen vinden wat sij antwoorden moghen.

12

Daerom begheert mijn woorden, hebt die lief, ende ghy sult onderwijsinghe hebben.

13

Die wijsheyt is claer ende sij en verdwijnt nemmermeer, ende sij wordt lichtelijck ghesien van die ghene die haer beminnen, ende sij wort gheuonden vanden ghenen die haer soecken.

14

Sij voorcoemt henlieden die haers begheeren, ⁺om dien haer seluen ierstmael te verthoonen,

+ C

15

wie van smorgens vroech tot haer waect die en sal niet arbeyden, want hy salse voor sijn doere vinden sitten.

16

Daerom van die te dencken dats eenen volcomen sin, ende die om haren wille waket die sal haestelijck versekert sijn,

17

want sij gaet omme soeckende sulcke die haers weerdich sijn ende in die weghen sal sij haer seluen dien blijdelijc verthoonen, ende in alle voorsienicheyt sal sij die te ghemoete loopen,

18

want haer beghinsel is die alderwarachtichste begheerte der onderwijsinghen.

19

Daerom die neersticheyt der onderwijsinghen is die liefde, ende die liefde is een bewaringhe haerder wetten, ende die bewaringhe der wetten, is een volcomenheyt der ombederffelijcheyt,

20

ende die ombederffelijcheyt doet Gode aldernaest sijn.

21

⁺Aldus soo brengt die begheerte der wijsheyt totten eewighen rijcke.

+ D

22

Daerom ist sake dat ghy ghenoechte hebt in die rijcs stoelen ende sceptren o ghi coninghen des volcs, soo hebt lief die wijsheyt, dat ghy inder eewicheyt moecht regneren.

23

Bemint het licht der wijsheyt ghy allegader die ouerste sijt van vele volcs,

24

maer wat die wijsheyt is, ende hoe sij gemaect is dat sal ick verhalen, ende ick en sal voor v lieden niet verborghen Godts verholentheden, maer van dat beghinsel haerder gheboorten sal icse ondersoecken, ende stellen int licht haer kennisse, ende ick en sal die waerheyt niet voorby gaen,

25

noch ic en sal met die verdwijnende nijdicheyt ouer wech niet ghaen, want sulck mensch en sal der wijsheyt niet deelachtich sijn,

26

Maer die menichte der wijsen is die gesontheyt vanden omganck der eerden, ende een wijs coninck is een vasticheyt des volcs.

27

Daerom ontfanct onderwijsinghe door mijn woorden, ende tsal v baten.