Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺OCh hoe schoone is een suyuer generatie met claerheyt, want haer ghedenckenisse is onsterffelijck, want sij is by Gode bekent, ende by die menschen.

+ A

2

Als sij teghenwoordich is soo volghen sij haer nae, ende sij begheeren haer als sij haer seluen ontrocken heeft, ende sij triumpheert ghecroont inder eewicheyt, winnende den loon der ombesmetter strijden

3

maer die veelderhande geboren menichte en salniet nut sijn, ende die bastaerde spruytsels en sullen gheen diepe wortelen scieten, noch en sullen gheen ghestadighe vasticheyt legghen.

4

Ende eest dat sij tot tacken metter tijt groeyen, soo sullen sij cranckelijck ghestelt van den wint beroert worden, ende van te seer groote winden wtghewortelt worden,

5

⁺want die onuolmaecte tacken sullen ghebroken worden, ende haer vruchten sullen onnut wesen, ende suer om teten, ende nerghers toe bequaem.

+ B

6

Want alle die kinderen die vanden boosen gheboren worden die sijn ghetuyghen der boosheyt teghen die ouders int onderuraghen van henlieden,

7

maer die rechtuerdighe eest dat hy vander doot verrascht wort soo sal hy in vercoelinghe wesen,

8

want die ouderdom is eerlijck niet die langhe gheduert heeft, noch oock die gherekent wort metten ghetale der iaren, maer die sinnen des menschen sijn grijs,

9

ende een ombeulect leuen, is den tijt des ouderdoms.

10

Dese Gode behaghende is bemint gheworden, ende leuende onder die sondaers is hy ouergheuoert,

11

⁺hy is wech ghenomen dat die quaetheyt sijn verstant niet en soude verandederen, oft dat die gheueynstheyt sijn ziele niet en soude bedrieghen.

+ C

12

Want die betooueringhe der ydel clappinghen verdonckert goede dinghen, ende die onghestadicheyt der quaetlusticheyt verkeert den sin sonder archeyt.

13

In corten tijt voleynt heeft hy veel tijts veruult,

14

want sijn ziele was Gode behaghelijc, daerom heeft hy hem haestelijc wtgheleyt wt dat midden der ongherechticheden, maer die luyden dit siende, en verstaen noch en nemen sulcke dinghen niet ter herten,

15

dat die gratie Gods ende die bermherticheyt is tot sijn heylighen, ende sijn aenscouwen op sijn wtuercorene.

16

⁺Maer een ghestoruen rechtuerdich mensch verdoemt die leuende ongoddelijcke, ende sijn ioncheyt haestelijcker voleynt, verdoemt het lanc leuen vanden onrechtuerdighen,

+ D

17

want sij sullen des wijsen eynde sien, ende en sullen niet verstaen wat God van hem ghedacht heeft, ende waerom dat hem die Heere beheymt heeft.

18

Want si sullent sien, ende hem versmaden, maer die Heere salse bespotten,

19

ende sij sullen nae desen afuallende sijn sonder eere, ende in versmaetheyt onder die dooden inder eewicheyt, want hy salse van een schoeren die opgheblasen sijn sonder stemme, ende hy salse beroeren vanden fundamenten, ende sij sullen tot ten oppersten toe verwoest worden, ende sij sullen suchtende sijn, ende hen ghedenckenisse sal vergaen.

20

Sij sullen beureest comen in ghedenckenisse van haren sonden, ende hen boosheden sullen wroeghen teghen hen seluen.