Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer der rechtuerdigher zielen sijn in Gods hant, ende die pijne des doots en sal die niet raken.

+ A

2

Sij schijnden den ooghen vanden onwijsen te steruen, ende haren wtganc is gheacht te wesen een pijninghe.

3

Ende vanden rechtuerdighen wech sijn sij ghegaen in die doot, ende inden wech der doodt die van ons is, maer sij sijn in vreden,

4

Ende al hebben sij voor die menschen tormenten gheleden, hen hope is vol onsterffelijcheyts.

5

In luttel dinghen ghequelt sijnde sullen sij in veel dinghen wel bescict worden, want Godt heeftse gheproeft, ende gheuonden sijns weerdich.

6

⁺Ghelijc tgout int forneys heeft hijse gheproeft ende ghelijck een slachofferande des brantoffers heeft hijse ontfanghen, ende inder tijt sullen sij aensien worden.

+ B

7

Die rechtuerdighe sullen blincken, ende ghelijck ghensteren sullen sij int rietbosch ouer al loopen.

8

Sij sullen die natien ordeelen, ende heerscappie hebben ouer die volcken, ende hen Heere sal regneren inder eewicheyt.

9

Die in hem betrouwen sullen die waerheyt verstaen, ende die ghetrouwe sijn in die liefde sullen hem ghehoorsaem sijn, want sijn wtuercorene hebben die gaue ende den vrede.

10

Maer die ongoddelijcke na dat sij ghedacht hebben sullen sij straffinghe hebben, die den rechtuerdighen veracht hebben ende vanden Heere afgegaen sijn.

11

⁺Want so wie die wijsheyt ende onderwijsinghe verworpt, die is onsalich, ende hare hope is ydel, ende hen arbeyden sijn sonder vruchten, ende hen wercken onnutte.

+ C

12

Hen vrouwen sijn onverstandich ende hen kinderen sijn dalder archste,

13

hen geslachte is vermalendijt want salich is die onuruchtbare, ende die onbesmette die geen bedde bekent en heeft in misdaet, sij sal vrucht hebben int aenscouwen der heyligher zielen,

14

ende een ghesneden man die door sijn handen gheen boosheyt ghewracht en heeft, nocht ghedacht en heeft teghen God dalderbooste dinghen want hem sal ghegheuen worden die vercoren gaue des gheloofs, ende dalder ghenaemste deel inden tempel Gods.

15

⁺Want die vrucht der goeder arbeyden is glorioes, ende die wortel der wijsheyt die niet en veruallet,

+ D

16

maer die kinderen der ouerspeelders sullen in die verderffenisse wesen, ende dat saet van een onrecht bedde sal wtgheroeyt worden.

17

Ende al eest voorwaer dat sij langhe leuen sullen, soo sullen sij nochtans voor

[p. *518]

niet gherekent worden, ende sonder eere sal hen laetste ouderdom wesen.

18

Ende eest dat sij vroegher steruen, soo en sullen sij gheen hope hebben, noch aensprake inden dach der kennissen,

19

want die boose natien sullen een grouwelijck eynde hebben.