Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺VVat suldi sien in die Sunamitinne anders dan reyen der heyrlegheren? Hoe schoon sijn v ganghen in die schoenen, ghy dochter des princen? Die voechselen van uwen dgyen sijn ghelijck halsbanden die ghemaect sijn door die hant des constenaers.

+ A

2

Vwen nauel is eenen ghedraeyden nap den welcken nemmermeer dranck en ghebreect, uwen buyc is ghelijck eenen hoop terwen omsedt met lelien.

3

V twee borsten sijn ghelijc twee hindekens tweelingen van een capret.

4

⁺Vwen hals is ghelijck eenen yuoren torre. V ooghen sijn ghelijck die vijuers in Hesebon die in die poorte sijn van die dochter der menichten. Vwen nase is als den torre van Libanus die teghen ouer Damascus siet.

+ B

5

V hooft is als Carmelus, ende den crans ws hoofts is als des conincks purpure ghebonden in ploeyen.

6

Hoe schoon sijdi ende hoe cierlijck alderliefste in wellusticheden?

7

V hoochde is ghelijck worden den palmboom, ⁺ende v borsten den wijndruyuen.

+ C

8

Ick heb gheseydt ick sal opden palmboom climmen, ende sijn vruchten aengrijpen, ende v borsten sullen wesen als die druyuen des wijngaerts, ende den rueck ws monts als der appelen.

9

V kele is ghelijc den besten wijn, weerdich mijnen beminden om te drincken, ende sijn lippen ende tanden om te herknouwen.

10

Ick hoor mijnen lief toe, ende tot my is sijn toekeeringhe.

11

Coemt mijn beminde, ende laet ons wtgaen int velt, ⁺laet ons woonen in die lanthuysen.

+ D

12

Laet ons vroech opstaen tot die wijngaerden, laet ons besien oft den wijngaert ghebloeyet is, ende oft die bloemen vruchten voorts brenghen, oft die granaet appelen ghebloeyt hebben, daer sal ick v mijn borsten gheuen.

13

Die Mandragoren hebben rueck ghegheuen. In onse poorten alle die appelen nieuwe ende oude mijn beminde heb ick voor v bewaert.