Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺VVie mocht mi gheuen v mijnen broeder suyghende mijns moeders borsten, dat ick v buyten vonde, ende dat ic v mocht cussen, ende dat my nv niemant en versmade?

+ A

2

Ick sal v grijpen ende leyden in mijns moeders huys. Daer suldi my leeren, ende daer sal ick v eenen dranck gheuen van den ghemaecten wijn, ende den most van mijnen granaet appelen.

3

Sijn slincke hant is onder mijn hooft ende sijn rechte hant sal my omhelsen.

4

Ick besweere v ghy dochteren van Ierusalem dat ghy niet en wect, ⁺noch en doet ontwaken mijn lief tot dat si wilt.

+ B

5

Welck is dese die opclimt vander woestijnen van wellusticheden oueruloeyende leuende op haren beminden? Onder den appel boom heb ick v ghewect daer is v moeder onteert, daer is si gesceynt die v gebaert heeft.

6

Stelt my als een teeken op v herte, als een teeken op uwen arm, want die liefde is sterc als die doot, die ialoursheyt is hart als die helle, , haer lampen sijn als lampen des viers ende der vlammen.

7

Veel wateren en sullen die liefde niet moghen wtblusschen, ⁺noch gheen vloeden en sullen die oueruallen. Eest dat een mensch gheeft alle tgoet sijns huys voor die liefde soo sal hy dat als voor niet versmaden.

+ C

8

Ons suster is cleyne, ende sij en heeft gheen borsten, wat sullen wij onser suster doen opden dach als sij aenghesproken sal worden.

9

Is sij eenen muer soo laet ons daer op timmeren silueren voorcanteelen, is sij een doere soo laet ons die tsamen voeghen met Cedren barderen.

10

Ick ben eenen muer, ende mijn borsten ghelijck eenen torre nae dat ick gheworden ben voor hem als vrede vindende.

11

Eenen wijnghaert hadde die vreedsamighe in die plaetse die volck heeft, ⁺hy heeft dien gheleuert den bewaerders, een man brengt voor die vrucht van dien duysent silueren penninghen.

+ D

12

Mijnen wijngaert is voor my. V duysent vreedsamighe, ende twee hondert den ghenen die sijn vruchten bewaren.

13

Die daer woont in die houen, die vrinden luysteren doet my v stemme hooren.

14

Vliet mijn beminde, ende wort ghelijck den capret, ende den hinde der herten op die berghen der specerien.

Hier eyndet dat boeck van Salomons sanghen, Int latijn Cantica canticorum ghenoemt.