Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺MYn beminde is nederghedaelt in sijnen hoff tot dat hoefken der costelijcker specerien, dat hy ghevoet soude worden in die houen ende lelien vergaderen.

+ A

2

Mijn beminde is mijne ende ick ben zijne die gheuoet wort tusschen die lelien.

3

Schoon sijdi mijn vriendinne, suet ende cierlijck ghelijck Ierusalem, veruaerlijck als een wel ghescicte slachorden der heyrlegheren.

4

Keert v ooghen van my want sij hebben my doen wech vlieghen. V hairen sijn ghelijck een cudde gheyten die hen openbaerden van Galaad.

5

V tanden sijn als een cudde scapen die op gheclommen sijn vander wasscherien, ⁺alle met tweelinghen, ende daer en is gheen onvruchtbaer onder hen.

+ B

6

Ghelijck die scorsse vanden granaet appel alsoe sijn v wanghen, sonder v verborghentheden.

7

Tsestich sijnder coninghinnen, ende tachtentich concubinen, ende der iongher dochteren en is gheen ghetal.

8

Eene is mijn duyue mijn volmaecte, een is haerder moeder wtuercoren der gheender die haer ghebaert heeft. Die dochteren hebbense ghesien, ende als dalder salichste ghepresen die coninghinnen ende concubinen, ende sij hebbense gheloeft.

9

Wie is dese die voert coemt als eenen opgaende dagheraet, schoon als die mane, wtghecoren als die sonne, veruaerlijck als een slachorden der heyrlegheren wel ghescict?

10

Ic ben nederghedaelt inden hoff der noten, ⁺dat ick sien soude die appelen der dellinghen, ende dat ic besien soude oft den wijn-

+ C

[p. *516]

gaert ghebloeyt ware, ende oft die granaet appelen wtghesproten waren.

11

Ick en hebs niet gheweten.

Mijn ziele heeft my verbaest ghemaect om die waghenen van Aminadab.

12

Keert weder, keert weder, ghy Sunamitinne, keert weder, keert weder dat wij v aensien moghen.