Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺MYn beminde coeme in sijnen hoff, op dat hy ete die vrucht sijnder appelboomen. Coemt in mijnen hoff mijn suster mijn bruyt, ic heb mijn myrrhe ghemaeyet met mijnen costelijcken specerien, ick heb gheten hoenichraten met mijnen hoenich, ick heb mijnen wijn ghedroncken met mijnen melcke, eet vrienden, ende drinct, ende wert droncken alderliefste.

+ A

2

Ick slape ende mijn herte waect. Die stemme mijns beminde cloppende. Doet my open mijn suster, mijn vriendinne, mijn duyue, mijn ombesmette want mijn hooft es vol dauws, ende mijn hair vlechten vol druppelen der nachten.

3

Ick heb my ontcleedt van mijnen rock, hoe sal ic daer mede ghecleedt worden? Ick heb mijn voeten ghewasschen, hoe sal ick die vuyl maken?

4

Mijn beminde heeft sijn hant ghesteken doer tgat, ende mijnen buyck verscrickte van sijnen aentasten.

5

⁺Ic ben opghestaen dat ic mijnen beminden open doen soude, mijn handen druypten myrrhe, ende mijn vingheren waren vol van die alderbeeste myrrhe.

+ B

6

Die grendele van mijnder dooren heb ic mijnen beminden gheopent, maer hy was gheweken, ende voerbij ghegaen. Mijn siele is ghesmolten doen hy sprack, ic heb ghesocht, ende en heb hem niet vonden, ick heb gheroepen ende hy en heeft my niet gheantwoert.

7

Die bewaerders hebben my vonden die de stadt ommegaen, sij hebben my gheslaghen, ende my ghewont, die wachters der mueren hebben my mijnen mantel ghenomen.

8

Ic beswere v ghy dochteren van Ierusalem, ⁺eest dat ghy mijnen beminden vint dat ghy hem bootscapt dat ick van liefden quele.

+ C

9

Hoedanich is v beminde wt den beminden, o alderschoonste der vrouwen? Hoedanich is v beminde wt den beminden, dat ghy ons alsoo besworen hebt.

10

Mijn beminde is wit ende root verwich, wt ghecoren wt dusentich.

11

Sijn hooft is dalderfijnste gout. Sijn hair vlechten sijn ghelijck opghehauen tacken der palmboomen, swart ghelijck een raue.

12

Sijn ooghen sijn als die duyuen op die riuierkens der wateren, die met melcke ghewasschen sijn, ende rusten neder by die alder volste vloeden.

13

Sijn wanghen sijn ghelijck hoef beddekens der costelijcker cruyden besaeyt van den apotekers. ⁺Sijn lippen sijn lelien druyppende die beste myrrhe.

+ D

14

Sijn handen sijn ront ghedraeyt gulden, vol Hyacinthen. Sijnen buyck is yuoiren ondersceyden met Saphiren.

15

Sijn beenen sijn marmoren columnen die ghefundert sijn op gulden basementen. Sijn ghedaente is als Libanus, wtghecoren als cederboomen.

16

Sijn kele is daldersuetste ende gheheel lieflijck, sulck is mijn beminde ende hy is mijn vrient dochteren van Ierusalem.

17

Waer henen is v beminde wech ghegaen o alderschoonste der vrouwen? werwaerts is v lief aff gheweken, ende wy sullen hem met v suecken?