Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺HOe schoon sijdi mijn vrindinne, hoe scoone sijdi? v oogen sijn der duyuen, sonder dat daer binnen verborghen is. V hair is als die cudden der gheyten die opgheclommen sijn vanden bergh Galaad.

+ A

2

V tanden sijn als cudden van ghescoren scapen die opgeclommen sijn vander wasscherien, alle gader sijn sij tweelinghen voertbrenghende, ende onder hen en is gheen onvruchtbaer.

3

Ghelijck eenen purpuren hairbant sijn v lippen ende v wtsprake is suete. Ghelijck een affghebroken stuck van eenen granaet appel, alsoo sijn v wanghen, sonder tghene datter binnen in verborghen is.

4

⁺Ghelijck Dauids torre is uwen hals, die ghetimmert is met voercanteelen, duysent scilden hanghen daer wt, alderande wapen der stercken.

+ B

5

V twee borsten sijn als twee ionghe hindekens eens caprets tweelinghen, die ghevoet worden in die lelien

6

tot dat den dach coel worde, ende dat die scaduwen neder dalen. Ic sal gaen totten berch der mirrhen ende tot den hueuele des wieroocs.

7

Gheheel schoon sijdi mijn vriendinne, ende gheen smette en is in v.

8

⁺Coemt van Libanus mijn bruyt, coemt van Libanus, coemt ghi sult ghecroont worden van den oppersten Amana van den top van Samir, ende Hermon, van die slaepholen der leuwen, van die berghen der lupaerden.

+ C

9

Ghy hebt mijn herte ghewont mijn suster mijn bruyt, ghi hebt mijn herte ghewont met een van uwen ooghen, ende met een hair van uwen halse.

10

Hoe schoon sijn v borsten mijn suster mijn bruyt, schoonder sijn v borsten dan wijn, ende den rueck van uwen welriekende saluen, is bouen alle costelijcke specerien.

11

Druyppende honichrate sijn v lippen mijn bruyt honich ende melck sijn onder v tonghe, ⁺ende den rueck van uwen cleederen is ghelijck den rueck des wieroocs.

+ D

12

Eenen beslotenen hoff sijdi mijn suster mijn bruyt eenen beslotenen hoff, een toegheseghelde fonteyne.

13

V spruytkens sijn een paradijs van granaet appel boomen, met die vruchten der appelen.

14

Cyperen met nardus, nardus ende sofferaen, Cassiafistele ende caneel met alle die boomen van Lybanus, myrrha ende aloe met alle die beste saluen.

15

Een fonteyn der houen, eenen put der leuender wateren, die met een ghedruysch vlieten van Lybano.

16

Staet op noortwint, ende coemt suytwint, ende doerwaeyt mijnen hoff, ende laet sijn welriekende specerien vloeyen.