Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

IC ben een bloeme des velts, ⁺ende een lelie der dellinghen.

+ A

2

Ghelijc een lelie onder die dornen, alsoe is mijn vriendinne onder die dochteren.

3

Ghelijc eenen appelboom onder die boomen der bosschagien, alsoe is mijn lief onder die sonen. Onder die scaduwe vanden ghenen die ic begheert hadde heb ic geseten, ende sijn vrucht is suet mijnder kelen.

4

Hi heeft my gheleydt in den wijn keldere, hy heeft die liefde in my ghescict.

5

Onderset my met bloemen, ⁺omset my met appelen, want ick quele van liefden.

+ B

6

Sijn slincke hant is onder mijn hooft ende sijn rechte hant sal my omhelsen.

7

Ic beswere v ghi dochteren van Ierusalem by die capretten ende herten der velden, dat ghy niet en wect noch en doet ontwaken mijn lief tot dat sij selue wilt.

8

Die stemme van mijnen beminden, siet dese coemt springhende op die berghen, ouerspringhende die hueuelen.

9

Mijn beminde is ghelijck een capret ende een hindeken der herten, ⁺siet hy staet achter onsen want siende doer die vinsteren, ende van verre siende doer die tralien.

+ C

10

Ende mijn beminde spreect my toe. Staet op haest v mijn vriendinne, mijn duyue, mijn schoone, ende coemt,

11

want den wintere is nu voerbij gheleden, den reghen is wech ghegaen ende ouerleden.

12

Die bloemen sijn ghesien in ons lant, den tijt des snoeyens is aen ghecomen. Die stemme der tortelduyuen is ghehoort in ons lant,

13

den vijchboom heeft sijn vroeghe vijghen voerts ghebracht, die bloeyende wijngaerden hebben ruec ghegheuen. Staet op mijn vriendinne, ⁺mijn schoone ende coemt.

+ D

14

Mijn duyue in die gaten der steenroetsen, in dat hol vanden muer, thoont my v aensicht, laet v stemme luyden in mijn ooren, want v stemme is soete ende v aensicht schoone.

15

Vangt ons die cleyne voskens, die de wijngaerden verderuen, want onsen wijngaert is ghebloeyt.

16

Mijn beminde is mijn, ende ich ben sijn, die welcke ghevoedt wort tusschen die lelien,

17

tot dat den dach op comet, ende die scaduwen nederdalen. Keert wederom, Mijn beminde weest ghelijck dat capret ende dat hindeken der herten op die berghen van Bethel.