Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺HY cusse mi met dat cussen sijns monts, want v borsten sijn beter dan wijn,

+ A

2

welriekende nae die alderbeste saluen. Wtghestorte olie is uwen naem, daer om hebben v die ionghe dochterkens lief ghehadt.

3

Trect my, wy sullen nae v loopen inden rueck van uwe saluen. Die coninck heeft my binnen gheleyt in sijn kelderen wy sullen ons verhueghen ende verblijden in v, ghedachtich uwer borsten bouen den wijn, die oprechte hebben v lief.

4

Ick ben swart maer schoon van ghedaente, ⁺ghy dochteren van Ierusalem ghelijck die tabernakelen van Cedar, als Salomons vellen.

+ B

5

En wilt my niet aenmercken dat ick bruyn ben, want die sonne heeft my ontverwet. Mijns moeders kinderen hebben teghen my ghestreden, sij hebben my een bewaerdersse der wijngaerden ghestelt, ick en heb mijnen wijngaert niet bewaert.

6

Gheeft my te kennen ghy den welcken mijn ziele bemint, waer ghy weydet, waer ghy rustet inden middach, op dat ick niet en beghinne herwaerts ende derwaerts woestelijck te loopen, ⁺nae die cudden uwer ghesellen.

+ C

7

Eest dat ghy v seluen niet en kent o alderschoonste onder die vrouwen, soe gaet wt ende volcht achter die voetstappen der cudden, ende weydt v bocken by die tabernakelen der herderen.

8

By mijnder rijdinghen in Pharaos waghenen heb ick v gheleken mijn vriendinne.

9

Schoon sijn v wanghen als eender tortelduyuen, uwen hals is ghelijck hals cieraeten.

10

Gulden ghewronghen ketenkens sullen wy v maken, ghescakiert met siluer.

11

Doen die coninck in sijn ruste was, soe heeft mijnen nardus haren rueck ghegheuen.

12

⁺Een bondelken myrrhen es mijn lief my, tusschem mijn borsten sal hi woonen.

+ D

13

Eenen druyf van Cypers es mijn lief my, in die wijngaerden van Engaddi.

14

Siet ghy sijt schoone mijn vriendinne, siet ghy sijt schoone, v ooghen sijn als der duyuen.

15

Siet ghy sijt schoone mijn lief ende cierlijck. Ons beddeken is bloemich,

16

die keyers van onsen huysen sijn van Cederen, die haenbalken van Cypressen.