Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺UVerpt v broot op die voerbijgaende wateren want nae veel tijden suldi dat vinden.

+ A

2

Gheeft een deel den seuenen ende oock den achten, want ghy en weet niet wat quaet datter comen sal op die eerde.

3

Eest dat die wolcken veruult sullen wesen, soe sullen sij reghen op die eerde wtstorten. Eest dat een hout valt ten suyden oft ten noorden, in wat plaetse dat valt daer salt sijn.

4

Wie de winden gade slaet, die en saeyt niet, ende wie de wolcken aenmerct die en sal nemmermeer maeyen.

5

⁺Alsoe ghy niet en weet, welck den wech des wints es, ende in wat manieren die beenderen tsamen ghevoecht worden in den buyck van eender bevruchter vrouwen, alsoo en weet ghy niet die wercken Godts die een maker is van alle dinghen.

+ B

6

Des morghens vroech saeyt v saet, ende tsauonts en laet v hant niet ophouden, want ghy en weet niet wat meest voertcomen sal, dit oft dat, ende eest dat beyde tsamen voertcoemt, soo salt beter sijn.

7

Dlicht is soet, ende ghenoechelijck eest metten ooghen die sonne te sien.

8

⁺Eest dat een mensch veel iaren leeft, ende dat hy in alle dese blijde is, soe moet hy ghedachtich wesen des donckeren tijts, ende van vele daghen, ⁺die welcke als sij comen sullen sijn, soe sullen die voerleden dinghen van ydelheden ghestraeft worden.

+ C

+ D

9

Hier om soo verblijt v ionghelinck in v ionghe iuecht, ende laet v herte int goet wesen in die daghen uwer ioncheyt, ende wandelt in die weghen ws herten, ende in dat aenscouwen uwer ooghen, ende weet dat v voer alle dese dinghen die Godt ombrenghen sal ten ordeele.

10

Doet die gramscap wech van uwer herten, ende doet die quaetheyt van uwen vleesche.Want die ioncheyt ende wellusticheyt sijn ijdel.