Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺DIe steruende vlieghen bederuen die soeticheyt der saluen. Costelijcker is die wijsheyt ende glorie dan een cleyn sotheyt wat tijts duerende.

+ A

2

Het herte vanden wijsen is in sijn rechte

[p. *513]

hant, ende therte vanden sot is in sijn slincke handt.

3

Maer oock een sot inden wech wandelende, want hy onwijs is soe acht hy alle menschen voer sotten.

4

Eest dat den gheest van een die macht heeft opclimt bouen v, soo en verlaet v plaetse niet, want sachticheyt doet ophouden die aldermeeste sonden.

5

Daer is een quaet dat ick ghesien hebbe onder die sonne, als by dwalinghe wt comende van des princen aensicht,

6

dat eenen dwaes ghestelt in hoogher weerdicheyt, ende dat die rijcke beneden sitten.

7

⁺Ick heb ghesien knechten te peerde rijden, ende princen gaende op deerde als knechten.

+ B

8

Wie een grachte graeft die sal daer inne vallen, ende wie eenen thuyn ontvlecht, dien sal een slanghe bijten.

9

Wie steenen verdraecht, die sal daer mede moeyte hebben, ende die hout clieft, sal daer aff ghequetst worden.

10

Eest dan een ysere wapen bot gheworden is ende dat niet en is als te voren, maer dat plomp es gheworden, soo salt met veel arbeyts ghescerpt worden, ende na behendighe naerstichyt sal wijsheyt volghen.

11

⁺Eest dat een serpent bitet in stillicheyt, niet min en heeft hy die heymelijck achterclap doet.

+ C

12

Die woerden van een wijsen mont sijn gratie, ende die lippen vanden onwijsen sullen hem nederworpen.

13

Tbeghinsel van sijnen woerden is wijsheyt, ende dlaetste sijns monts is een seer quade dolinge.

14

Een sot maect veel woerden. Een mensch en weet niet wat voer hem gheweest is, ende wat nae hem sijn sal wie sal hem dat moghen te kennen gheuen?

15

Der dwasen arbeyt sal hen pijneghen, die niet en weten in die stadt te gaen.

16

Wee v ghy lant diens coninck een kint is, ende diens princen smorghens vroech eten.

17

⁺Salich is dlandt welcs coninck edel is, ende welcs princen te haren tijde eten, om gheuoedt te sijne niet tot ouerdaet.

+ D

18

Doer luyheden sal die solderinghe der kepers nedersinken, ende doer die slapheyt der handen sal thuys doer druppen.

19

Tot lachen maken sij broot ende den wijn om dat sij drinckende blijde maeltijde houden souden, ende den ghelde sijn alle dinghen onderdanich.

20

In v ghedachte en lastert den coninck niet, ende int secreet van uwer slaepcameren en vermaledijt den rijcken niet. Want oock die voghelen des hemels sullen v stemme draghen, ende die vloghelen heeft sal die meyninghe bootscappen.