Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ALle dese dinghen heb ick ouerleyt in mijn herte dat ict seer neerstelijck verstaen soude. Daer sijn rechtuerdighe ende wijse ende hen wercken sijn in die handen Godts, ende nochtans en weet die mensch niet oft hy des haets oft der liefden weerdich is,

+ A

2

maer alle dinghen worden tot den toecomenden tijt onseker ghehouden, om dat alle dinghen ghelijckelijck ghescieden den rechtuerdighen ende den ongoddelijcken, den goeden ende den quaden, den suyueren ende onsuyueren, den ghenen die slachofferanden offert ende die die sacrificien versmaet, ghelijck die goede soo vaert ooc die sondaer, ghelijck die meyneedighe alsoe vaert ooc die sweert dat warachtich is.

3

Dat is dalder quaetste onder alle dinghen die welc onder die sonne gescieden. ⁺Want die selue dinghen allen menschen ghescieden, waer om dat die herten van die kinderen der menschen veruult worden met quaetheyt, ende versmaetheyt in hen leuen, ende daer nae sullen sij ter hellen waerts gheleyt worden.

+ B

4

Daer en is niemant die eewelijck leuet, ende die dees dincs betrouwen heeft Beter is eenen leuenden hont, dan eenen dooden leuw.

5

Want die leuende weeten dat sij steruen sullen, maer die doode en weeten voerts niet meer, noch sij en hebben voertaen gheenen loon, want hen ghedenckenisse is vergeten.

6

Die liefde oock ende den hate ende die nijdicheden sijn te samen vergaen, noch sij en hebben gheen deel in dese werelt, ende int werck dat onder die sonne ghedaen wort.

7

Daer om gaet henen ende eedt met blijscap v broot, ende drinct met vrolijcheyt uwen wijn, want v wercken behaghen Gode.

8

Tot allen tijden laet v cleederen wit sijn, ende en laet die olie van uwen hoofde niet ghebreken.

9

⁺Ghebruyct het leuen met uwer huysvrouwen die ghy bemint, alle die daghen van dat leuen uwer onghestadicheyt, die v ghegheuen sijn onder die sonne alle den tijt van uwer ydelheyt, want dit is ydel in v leuen ende in uwen arbeyt daer ghy mede arbeyt onder die sonne.

+ C

10

Alle dat v handt doen mach dat doet neerstelijck, want daer en sal noch werck, noch reden, noch wijsheyt, noch wetenheyt zijn, in die helle der waerts dat ghy haestelijck vaert.

11

Ick heb my ghekeert tot een ander dinck, ende ick heb ghesien onder die sonne, dat den loop niet toe en behoorde den rasschen, noch den strijdt den vromen, noch den wijsen tbroot, noch den leeraers die rijcdommen, noch den constenaers die beuallijcheyt, maer dat den tijt ende die auontuer in alle dinghen sijn.

12

Die mensch en weet sijn eynde niet, maer ghelijck die visschen gheuanghen worden met den anghel, ende die voghelen met den strick beuanghen worden, alsoo worden die menschen ooc gheuanghen in den quaden tijt, als hen dien ouerhoets ouercoemt.

13

⁺Oock heb ick dese wijsheyt ghesien onder die sonne ende die ghehouden voer daldermeeste.

+ D

14

Daer is gheweest een cleyn stadt ende luttel mannen waren daer inne, een groot coninck is tegen dese comen, ende heeftse belegert, ende heeft daer rontsomme bolwercken ghemaect, ende dat beleg is volbracht gheweest.

15

Ende daer binnen is gheuonden een arm man ende wijs, ende hy heeft die stadt verlost doer sijn wijsheyt, ende niemant en heeft voertaen ghedachtich gheweest des armen menschs.

16

Ende ick seyde dat die wijsheyt beter was dan stercheyt, hoe is dan des armen mans wijsheyt versmaet gheweest ende hoe en sijn, zijn woerden niet ghehoort?

17

Der wijsen woerden worden ghehoort in stillicheyt, meer dan tgheroep van eenen prince onder die sotten.

18

Beter is wijsheyt dan orloossche wapenen, ende die in een sake sondicht sal veel goeds verliesen.