Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺DIe wijsheyt des menschen schijnt in sijn aensicht ende die aldermachtichste sal sijn aensicht veranderen.

+ A

2

Ick neme des conincs mont waer, ende die gheboden van Godts eedt.

3

En haest v niet wech te gaen van sijn aensicht, noch en blijft

[p. *512]

niet in een quaet werck, want alle dat hy wilt dat sal hy doen,

4

ende sijn woert is vol machts noch hem en mach niemant segghen. Waer om doedi alsoo?

5

Die tghebodt bewaert en sal niet quaets ondervinden. Dat herte vanden wijsen verstaet den tijt ende die antwoerde.

6

Alle saken hebben haren tijt, ende bequaemheyt ende veel is des menschen pijnlijcheyt,

7

om dat hi niet en weet die voerleden dinghen, ende dat hy die toecomende dinghen doer gheenen bode gheweten en can.

8

⁺Ten is in des menschen macht niet den gheest te verbieden, noch hy en heeft gheen macht in den dach der doot, noch hem en wort niet toeghelaten te rusten als die orloghe aenstaet, noch die ongoddelijcheyt en sal den ongoddelijcken niet behouden.

+ B

9

Alle dese dinghen heb ick aenmerct, ende heb mijn herte ghegheuen tot alle die wercken die onder die sonne gescieden, somtijts heeft deen mensch ouer den anderen mensch heerscappie tot sijn scade.

10

Ick heb ongoddelijcke begrauen ghesien, die welcke als sij noch leefden waren in die heylighe plaetse, ende sij worden ghepresen in die stadt als van rechtuerdighe wercken, maer dats oock ydelheyt.

11

Want voerwaer om dat het vonnisse niet ter stont en wort wtghesproken teghen die ongoddelijcke, soe bedrijuen die kinderen der menschen sonder eenighe vreese quade wercken.

12

⁺Maer nochtans in dien dat die sondaer hondertmael quaet bedrijft, ende doer die lijdtsaemheyt verdraghen wort soe heb ick bekent dat goet sijn sal den ghenen die Godt vreesen, die sijn aensicht ontsien.

+ C

13

En laet den ongoddelijcken gheen goet wesen, noch en laet sijn daghen niet verlinghet worden. Maer ghelijck een scaduwe laetse voerby gaen die daensicht des Heeren niet en vreesen.

14

Daer is noch een ander ydelheyt die opder aerden ghesciet, daer sijn rechtuerdighe den welcken quade dinghen ghescieden, als oft sij der ongoddelijcke wercken ghedaen hadden, ende daer sijn ongoddelijcke die soe vrij sijn sonder sorghe, als oft sij der rechuerdigher wercken hadden. Maer dat acht ick oock dalderydelste.

15

⁺Daer om heb ick ghepresen die blijscap, dat den mensch niet goet en was onder die sonne, dan dat hy ate ende droncke, ende blijde ware ende dat hy dit alleene met hem droeghe van sijnen arbeyt in die daghen sijns leuens die welcke hem Godt ghegheuen heeft onder die sonne.

+ D

16

Ende ick heb mijn herte daer toe ghegheuen dat ick die wijsheyt weten soude ende verstaen die verstroyende becommeringhe die op deerde ghesciet, daer is een mensch die noch dach noch nacht slaep en neemt met sijnen ooghen.

17

Ende ick heb verstaen dat die mensch van allen Godts wercken die onder die sonne ghescieden gheen redene gheuinden in can, ende hoe hi meer arbeyt om te soecken soe hy min vinden sal, oock al seyt die wijse dat hijt weet, soe en sal hijt niet moghen vinden.