Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺UVat noode eest eenen mensch te ondersoecken dinghen die meerder sijn dan hy is, als hy niet en weet wat hem orbaerlijck is in sijnen leuen int ghetal der daghen van sijnder pelgrimagien, ende binnen den tijt die ghelijck een scaduwe voerby ghaet? Oft wie soude hem moghen te kennen gheuen wat nae hem onder die sonne sijn sal.

+ A

2

Beter is eenen goeden naem dan costelijcke saluen, ende den dach der doot, dan den dach der gheboerten.

3

Beter eest te gaen tot een lijck huys, dan tot dat huys des blijden maeltijts, want int ghene wort vermaent het eynde van allen menschen, ende die leuende peynst watter toecomende is.

4

Beter is die gramscap dan het lachen, want doer die droeuicheyt des aensichts, wort het herte vanden misdoende verbetert.

5

Het herte der wijsen is daer droefheyt is, ende therte der dwasen daer blijscap is.

6

Tes beter ghestraft te worden van eenen wijsen, dan doert flatteren der dwasen bedroghen te sijne.

7

Want ghelijck dat gheluyt der bernender dornen onder eenen pot, alsoo is dat lachen van een sot, maer dat is oock ydelheyt.

8

Loghenachtighe beclappinghe verstoort den wijsen, ende sal die cracht sijnder herten bederuen.

9

⁺Beter is deynde des biddens dan tbeghinsel. Beter is een verduldich mensch dan een beroemende.

+ B

10

En sijt niet haestich tot gramscap, want die gramscap rust in den schoot vanden dwaes.

11

En segt niet, wat sake eest meyndi dat die voerleden ierste tijden, beter gheweest hebben dan sij nu sijn? want sulcke vraghe is dwaes.

12

Profijtelijcker is die wijsheyt met rijcdommen, ende sij baet meer den ghenen die de sonne sien.

13

Want ghelijck die wijsheyt bescermt, soo bescermt het ghelt ooc, maer dat heeft die wijsheyt ende gheleertheyt meer, dat sij dleuen gheuen haren besittere.

14

Aenmerct die wercken Godts dat niemant en can ghebeteren den ghenen die hy versmaet.

15

Inden goeden dach soo ghebruyckt die goede dinghen, ende voer den quaden dach wacht v te voren, want ghelijck desen soo heeft Godt dien ooc ghemaect, dat die mensch teghen hem gheen rechtuerdighe clachten en vinde.

16

Dese dinghen heb ick oock ghesien in die daghen mijnder ydelheyt. Die rechtuerdighe vergaet in sijn rechtuerdicheyt, ende die ongoddelijcke leeft langhen tijt in sijn quaetheyt.

17

⁺En wilt niet te veel rechuerdich wesen, noch en weest niet wijser dant van noode is, dat ghy niet verbaest en wort.

+ C

18

En wilt niet seer ongoddelijck doen ende en wilt niet dwaes wesen, op dat ghy niet en sterft buyten uwen tijt.

19

Tes goet dat ghy den rechtuerdighen onderhoudt, maer oock soo en ontrect v handt van dien niet, want wie Godt vreest die en versuymt niet.

20

Die wijsheyt heeft den wijsen versterct bouen thien princen der stadt.

21

Want daer en is gheen rechtuerdich mensch opder aerden die goet doet ende niet en sondight.

22

Maer oock tot allen woerden die gheseyt worden en wilt v herte niet gheuen, dat ghy bijauontueren niet en hoort den knecht v vermalendidende,

23

want v conscientie weet wel dat ghy dicmael andere vermalendijt hebt.

24

Alle dinghen heb ick ondersocht doer wijsheyt. Ick heb gheseyt, Ick sal wijs worden, ende die wijsheyt ghinck

25

noch veel verder van my dan zij was, ende een hooghe diepte wie sal die connen vinden?

26

⁺Ick heb alle dinghen doersocht met mijn herte, op dat ick weten soude ende bemercken, ende soecken die wijsheyt ende die redene, ende dat ick kennen soude des sots ongoddelijcheyt, ende die dwalinghe, der onwijser,

+ D

27

ende ick heb een vrouwe gheuonden die bitterder es dan die doot, die welcke is eenen strick der iaghers, ende een nette is haer herte. Haer handen zijn banden, die Gode behaecht sal haer ontvlieden, maer die een sondaer es sal van haer gheuanghen worden.

28

Siet dat heb ick gheuonden (heeft Ecclesiastes gheseyt) het een ende dander op dat ick die redene vinden soude

29

die welcke mijn ziele noch soect, ende ick en heb die niet gheuonden. Eenen man heb ick onder duysent ghevonden, maer gheen vrouwe en heb ick onder alle die gheuonden.

30

Alleenlijck heb ick dat gheuonden dat Godt den mensch recht ghemaect heeft, ende dat hy sij seluen met ontellijcken veel vraghen ghemenghet heeft. Wie is sulck als die wijse? ende wie heeft dat ontbintsel des woerts bekent?