Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺GHedenct ws sceppers in die daghen uwer ioncheyt, eer den tijt des lijdens come, ende eer die iaren ghenaken vanden welcken ghy sult segghen, sij en behaghen my niet,

+ A

2

eer die sonne verduystere, ende dlicht ende die mane, ende die sterren, ende eer die wolcken wedercomen nae den reghen,

3

als die bewaerders des huys beuen sullen, ende die alder stercste mannen wanckelen, ende als die molenarinnen sullen ledich sijn in cleynen ghetale, ende als verduystert sullen worden die sienders doer die gaten,

4

ende sullen die dooren sluyten in die strate met een neder stemme der molenarinnen, ende sullen opstaen totten gheluyt van eenen voghel, ⁺als alle die dochteren des sancs sullen doof worden.

+ B

5

Ende als die hoochden oock sullen vreesen ende ontsien inden wech, als den amandel boom sal bloeyen die sprinchaen sal vet worden ende die capparen sullen verdoruen worden. Want die mensch sal gaen int huys van sijnder eewicheyt. Ende sij sullen die straten ommegaen claghelijck weenende.

6

Eer dat tsilueren seelken ghebroken worde, ende eer dat die gulden huyue wederom loope, ende die cruycke ghebroken worde op die fonteyne, ende dat rat ghebroken worde op den put,

7

⁺ende eer dat het stoff wederkeere in sijn eerde daert aff was, ende dat den gheest weder gae tot Gode dien ghegheuen hadde.

+ C

8

Idelheyt der ydelheyt heeft Ecclesiastes gheseyt, ende alle dinck is ydelheyt.

9

Ende doen die Ecclesiastes was dalder wijste, soo heeft hy tvolck gheleert, ende vertelt tghene dat hy ghedaen hadde, ende ondersoeckende heeft hy veel ghelijckenissen ghemaect.

10

Hy heeft nutte woerden ghesocht, ende bescreuen seer oprechte redenen, ende vol waerheden.

11

⁺Die woerden der wijsen sijn als steecysers, ende ghelijck naghelen diep in gheslaghen, die doer der meesters raet ghegheuen sijn van eenen herder.

+ D

12

Meer dan dese mijn sone en wilt niet soecken. Van vele boecken te maken en is gheen eynde, ende vele ouerdenckens is des vleeschs quellinghe.

13

Deynde van spreken laet ons al tesamen hooren. Vreest Gode, ende onderhoudt zijn gheboden, want dat is alle mensch.

14

Ende alle dinghen die ghedaen worden sal Godt int ordeel brenghen voer alle verdoeltheyt, tsij oft goet is oft quaet.

Hier eyndt dat boeck Ecclesiastes dat is des predicans.