Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺EN wilt niet lichtelijck iet spreken, noch en laet v herte niet rasch sijn om een reden wt te segghen voer Godt. Want Godt is inden hemel, ende ghy sijt op die eerde, daer om laet v woerden luttel sijn.

+ A

2

Nae veel sorghen volghen droomen ende in veel woerden sal dwaesheyt gheuonden worden.

3

Hebdi Gode iet gheloeft en vertrect niet dat te betalen, want een onghetrouwe ende sotte belofte misnoecht hem, maer wat ghy gheloeft hebt dat betaelt,

4

ende tes veel beter niet te ghelouen, dan naer die ghelofte tbeloofde niet te betalen.

5

En gheeft uwen mont daer toe niet dat ghy v vleesch soudt doen sondighen, noch en segghet voer den enghel niet. Daer en is gheen voersienicheyt. Op dat Godt by auontueren gram sijnde teghen v woerden niet en verstroeye allen die wercken uwer handen.

6

⁺Daer veel droomen sijn, daer sijn veel ydelheden, ende ontellijcke veel redenen, maer ghy vreest Godt.

+ B

7

Eest dat ghy die allendighe siet tonrecht belieghen, ende ghewelt doende ordeelen, ende dat die rechtuerdicheyt verkeert wort int landscap, en verwondert v niet van dese sake, want bouen den hooghen es een ander noch hoogher, ende bouen dese sijn oock andere noch hoogher,

8

ende daer bouen is een coninck ghebodt hebbende ouer tgheheel landt dat hem dient.

9

Een ghierich mensch en sal niet veruult worden met ghelde, ende wie die rijcdommen lieff heeft, die en sal daer aff gheen vrucht nemen, daer om es dat oock ydelheyt.

10

Daer veel rijcdommen zijn, daer esser oock veel diese eten. Ende wat batet den besitter anders dan dat hy die rijcdommen siet met sijnen ooghen?

11

⁺Den slaep is suet den ghenen die arbeyt tsij oft hy veel oft luttel eet, maer die satheyt des rijcken en laet hem niet slapen.

+ C

12

Daer es noch een ander dalder quaetste crancheyt, die welcke ick ghesien hebbe onder die sonne, rijcdommen bewaert tot quade van haren Heere.

13

Want sij vergaen in een alderquaetste pijnlijcheyt, hy heeft eenen sone ghewonnen, die welcke sal in seer groote armoede wesen.

14

Ghelijck hy naect ghecomen is wt sijns moeders lichaem, alsoo sal hy wederkeeren, ende hy en sal niet met hem wechdraghen van sijnen arbeyt.

15

Tes met allen een allendighe crancheyt, ghelijck hy comen is alsoo sal hy wederkeeren. ⁺Daer om wat batet hem dat hy ghearbeyt heeft inden wint?

+ D

16

Alle die daghen sijns leuens heeft hy gheten in duysternissen, ende in veel sorghen, ende katiuicheyt ende droeffheyt.

17

Aldus heeft my dit goet ghedocht dat iemant ete ende drincke, ende ghebruycke blijscap wt zijnen arbeyt waer mede hy ghearbeyt heeft onder die sonne, al sijn leuen lanck, dat hem Godt ghegheuen heeft, ende dit is sijn deel.

18

Ende allen mensche den welcken Godt ghegheuen heeft rijcdommen, ende goet, ende heeft hem macht ghegheuen dat hy daer aff eten

[p. *511]

mach, ende ghebruycke sijn deel ende verblijde hem van sijnen arbeyt.

19

Dat is Godts gaue. Want hy en sal niet ghenoech ghedachtich wesen der daghen sijns leuens, om dat Godt sijn herte met wellusten becommert.