Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺IC heb my ghekeert tot ander dinghen, ende ick heb ghesien die onrechte oueruallinghen met loghenen die onder die sonne ghescieden, ende die tranen der onnooselen, ende gheenen trooster, ende dat sij haer gheweldicheyt niet en connen wederstaen die van alder menschen helpe verlaten sijn.

+ A

2

Ende ick heb meer ghepresen die doode dan die leuende,

3

ende ick heb noch saligher dan dese beyde gheacht den ghenen die noch niet gheboren en is, noch niet ghesien en heeft die quade dinghen die onder die sonne ghescieden.

4

Wederom heb ic aenghemerct alle die arbeyden der menschen, ende ick heb ghemerct dat die behendicheden benijdt worden vanden naesten, ende daer om is daer oock ydelheyt inne, ende nooteloose sorghe.

5

⁺Die dwaes voudt sijn handen te samen, ende eedt sijn vleesch segghende,

+ B

6

Beter is een hant vol met rusten, dan beyde die handen vol met arbeyde ende pijnlijcheyt des herten.

7

Aenmerckende heb ick gheuonden noch een ander ydelheyt onder die sonne.

8

Daer is eene ende hy en heeft gheenen tweeden, noch sone noch broeder, ende nochtans en houdt hy niet op van arbeyden, ende sijn ooghen en worden niet versaedt van rijcdommen, noch hy en herdenct niet segghende, Voer wien arbeyde ick ende ontrecke mijn ziele van goede dinghen? daer in is oock ydelheyt, ende een alder quaetste pijnlijcheyt.

9

⁺Daer om eest beter datter twee te samen sijn dan een.Want sij hebben gherief van malcanders gheselscap,

+ C

10

eest dat die eene valt, hy sal vanden anderen staende ghehouden worde. Wee den ghenen die alleen is, want als hy valt soe en heeft hy niemant die hem opheft.

11

Ende eest dat er twee samen slapen, soe sullen sy van malcanderen verwermt worden. Hoe sal een alleen connen werm worden.

12

Ende eest datter iemant den eenen verwint, soe sullen sij twee hem wederstaen, een dry dobbel zeelken en sal niet lichtelijck breken.

13

Beter is een arm kint ende wijs, dan eenen ouden coninck ende sot, die niet en can voersien in toecomende tijden,

14

dat wten kerker ende wten ketenen somtijts iemant coemt tot den conincrijck, ende dat een ander int conincrijck gheboren van armoeden vergaet.

15

⁺Ick heb alle die leuende ghesien die onder die sonne wandelen metten tweeden ionghelinc die voer hen opstaen sal.

+ D

16

Sonder eynde is tghetal des volcks van alle die voer hem gheweest hebben, ende die namaels sijn sullen en sullen hen in hem niet verblijden, maer dat is ooc ydelheyt ende pijnlijcheyt des gheests.

17

Bewaert uwen voet gaende int huys Godts, ende coemt by, dat ghy hooren moecht. Want veel beter is die ghehoorsaemheyt, dan der dwaser slachofferanden, die niet en weten wat quaet dat sij doen.