Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺Alle dinghen hebben eenen tijt, ende doer sijn spacien gaen alle dinghen voerbij onder den hemel.

+ A

2

Daer is eenen tijt gheboren te worden, ende eenen tijt te steruen. Eenen tijt te planten, ende eenen tijt wt te trecken datter gheplant is.

3

Eenen tijt doot te slaen, ende eenen tijt te ghenesen. Eenen tijt te verderuen, ende eenen tijt te timmeren.

4

Eenen tijt te weenen, ende eenen tijt om te lachen. Eenen tijt om te beclaghen, ende eenen tijt om te dansen.

5

Eenen tijt om steenen te verstroyen, ende eenen tijt om te vergaderen. Eenen tijt om te omhelsen, ende eenen tijt om verre te sijn van omhelsinghen.

6

Eenen tijt te vercrijghen, ende eenen tijt te verliesen. Eenen tijt te bewaren, ende eenen tijt wech te worpen.

7

Eenen tijt om van een te snyden, ende eenen tijt om aen een te naeyen. Eenen tijt te swijghen, ende eenen tijt te spreken.

8

⁺Eenen tijt der liefden, ende eenen tijt des haets. Eenen tijt der orloghen, ende eenen tijt des vreeds.

+ B

9

Wat heeft een mensch meer van sijnen arbeyd?

10

Ick heb ghesien die pijnlijcheyt die Godt ghegheuen heeft den kinderen der menschen, dat sij daer in seer becommert souden wesen.

11

Alle dinghen heeft hy goet ghemaect te sijnen tijde, ende die werelt heeft hy gheleuert tot haerder ondersoeckinghen, op dat die mensch niet en soude vinden dwerck dat Godt ghewracht heeft van tbeghinsel totten eynde toe.

12

Ende ick heb ghekent datter niet beters en is dan blijde sijn, ende wel doen in sijn leuen.

13

Want alle mensch die eedt ende drinct ende siet goet van sijnen arbeyt dat Godts gaue.

14

⁺Ick heb gheleert dat alle die wercken die Godt ghemaect heeft ghestadich blijuen inder eewicheyt, wy en moghen daer toe niet doen noch aff nemen die welcke Godt ghemaect heeft om dat hi ontsien soude wesen.

+ C

15

Dat ghemaect is dat selue blijft altijt, die dinghen die naemaels sijn sullen, hebben nu te voren gheweest, ende Godt hermaect tghene dat wech ghegaen is.

16

Ick heb onder die sonne ghesien in die plaetse des

[p. *510]

ordeels ongoddelijckeyt, ende in die plaetse der rechtuerdicheyt ongherechticheyt.

17

Ende ick heb in mijn herte gheseyt, den rechtuerdighen ende ongoddelijcken sal Godt ordeelen, ende den tijt van alle dinck sal dan sijn.

18

⁺Ic heb gheseyt in mijn herte van die kinderen der menschen datse Godt proeuen soude, ende toonen dat sij ghelijck sijn den beesten.

+ D

19

Daer om isser een steruen des menschs, ende der beesten, ende haer beyder conditie is ghelijck. Ghelijck die mensch sterft, alsoo steruen die ooc, sij trecken alle insghelijcs adem, ende een mensch en heeft niet meer dan een beeste. Alle dinghen sijn der ydelheyt onderworpen

20

ende si gaen allegader nae een plaetse, van eerde sijn sij ghemaect, ende sij keeren weder te samen in die eerde.

21

Wie weet oft den gheest van die kinderen van Adam opwaerts trect, ende oft den gheest van die beesten nederwaerts daelt?

22

Ende ick heb beuonden datter niet beters en is dan dat een mensch hem verblijt in sijn werck, ende dat dit sijn deel is. Want wie sal hem daer toe brenghen dat hy kenne die dinghen die nae hem comen sullen.