Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺EN volcht niet die quade mannen, noch en begheert met hen niet te sijne,

+ A

2

want hen herte denct op roouen ende hen lippen spreken bedrieghelijcheden.

3

Met wijsheyt sal een huys opghetimmert worden, ende doer voersichticheyt versterct,

4

doer gheleertheyt sullen die kelders ghevult worden met alderhande costelijcken ende schoonen rijcdom.

5

Een wijs man is sterck, ende een gheleert man is vroem ende machtich.

6

Want met ghescictheyt wort een orloghe ghevuert, ende salicheyt sal wesen daer veel raden sijn.

7

Den dwaes is die wijsheyt hooghe, in die poorte en sal hy sijnen mont niet open doen.

8

Die denct quaet te doen, sal een sot ghenoemt worden.

9

Tghepeys van eenen sot is sonde, ende een achterclapper is der menschen affgrijselijcheyt.

10

Eest dat ghy mishoept als ghy gheuallen sijt inden dach der benautheyt, soe sal v stercheyt ghemindert worden.

11

Verlost die ghene die ter doot gheleydt worden, ende die ter verderffenissen ghetrocken worden en wilt niet ophouden te verlossen.

12

⁺Eest dat ghy segghet die macht en heb ick niet, die de herten binnen siet hy verstaet dit, ende den behouder uwer zielen en is gheen dinck ombekent, ende hy sal den mensch loonen nae sijn wercken.

+ B

13

Eet mijn sone honich, want het is goet, ende honichraten seer suet uwer kelen,

14

alsoe is oock die leeringhe der wijsheyt uwer zielen, die welcke als ghy sult gheuonden hebben, soe suldi in die wterste hope hebben, ende v hope en sal niet vergaen.

15

En wilt gheen laghen legghen noch en suect gheen ongoddelijcheyt int huys vanden rechtuerdighen, noch en verwoest sijn ruste niet.

16

Want seuenmael sal een rechtuerdighe vallen, ende weder opstaen, maer die ongoddelijcke sullen vallen int quaet.

17

Als v viant gheuallen es, soe en verblijdt v niet, ende in sijnen val en laet v herte niet verhueghen,

18

dat die Heere dit bijauontuere niet en sie, ende dat hem misnoeghe ende dat hy sijn gramscap van hem neme.

19

⁺En wilt niet kijuen met die alderquaetste, noch en wilt niet volghen die ongoddelijcke,

+ C

20

want die quade en hebben gheen hope der toecomender dinghen, ende het licht vat der ongoddelijcker sal wtgheblasen worden.

21

Vreest den Heere mijn sone ende den coninck, ende metten achterclappers en menghet v niet.

22

Want onuersienlijck sal hen verderffenisse opstaen, ende wie weet den val van hen beyden?

23

Dese woerden sijn oock totten wijsen.

Dat bekennen van persoonen int oordeel en is niet goet.

24

Die den ongoddelijcken segghen ghy sijt rechtuerdich, dien sullen die volcken vermalendijden, ende die gheslachten sullen die haten,

25

die hem straffen, sullen ghepresen worden, ende op hen sal die benedictie comen.

26

Die lippen sal hy cussen die rechte woerden antwoert.

27

Bereyt buyten v werck, ende oeffent neerstelijck uwen acker, ende daer nae timmert v huys.

28

En sijt gheen ghetuych sonder sake teghen uwen naesten, noch en vertreyffelt niemant suetelijck met uwen lippen.

29

⁺En segt niet. Hoe hy my ghedaen heeft, soe sal ick hem oock doen, ick sal eenen ieghelijcken loonen nae sijn werck.

+ D

30

Doer den acker van eenen traghen mensch heb ick ghegaen, ende doer den wijngaert van eenen sotten man,

31

ende siet die netelen haddent al veruult, ende die dornen hadden sijn ouerste al ouerdect, ende den onghecalcten muer van steenen was verdoruen.

32

Het welcke als ick ghesien hadde, soe heb ict in mijn herte ghestelt, ende doer een exempel hebbe ick onderwijsinghe gheleert.

33

Hoe langhe sult ghy luy mensch slapen? Wanneer suldi van uwen droom opstaen? Een luttel (seg ick) suldi slapen, een weynichsken suldi sluymeren, ende een luttelken v handen te samen legghen om te rusten,

34

ende uwe armoede sal v comen als een looper, ende die bedelaerscap als een ghewapent man.