Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel

1

⁺ALs ghy sidt om te eten met eenen prince, so aenmerct neerstelijck wat daer voor v aensicht ghestelt is,

+ A

2

ende steldt een mes in v kele eest nochtans alsoo dat ghy v ziele in v macht hebt,

3

en begheert van sijnen spijsen niet, daer tbroot der loghenen in is.

4

En wilt niet arbeyden om rijck te worden, maer steldt uwen verstande een mate,

5

en heft v ooghen niet op tot die rijcdommen die ghy niet hebben en moecht, want sij sullen voor hen seluen vloghelen maken ghelijck des arents, ende sullen vlieghen in den hemel.

6

En eedt niet met eenen nijdighen mensch ende en begheert van sijnen spijsen niet,

7

want op die maniere eens waersegghers ende guyghelaers ordeelt hy dat hy niet en weet. Eedt ende drinct sal hy v segghen, ende sijn herte en is met v niet,

8

die spijsen die ghy gheten hebt suldi weder wtworpen, ende v schoon woorden suldi verliesen,

9

In die ooren der onwijser en spreect niet, want sij sullen die leeringhen van uwer wtspraken versmaden.

10

⁺En raect die palen der cleynder kinderen niet, ende inden acker der weesen en gaet niet,

+ B

11

want hen naeste is sterck, ende hy sal teghen v ordeelen hen sake.

12

Laet v herte tot die leeringhe ingaen, ende v ooren tot die woorden der wetenheyt.

13

En wilt den kinde die castijnghe niet ontrecken want eest dat ghy hem metter roeden slaet, hy en sal niet steruen,

14

ghy sult hem metter roeden slaen, ende sijn ziele suldi vander hellen verlossen.

15

Mijn sone eest dat uwen moet wijs is, soo sal mijn herte blijde sijn met v,

16

ende mijn nieren sullen hen verhueghen, als v lippen sullen oprechte dinghen ghesproken hebben.

17

En laet v herte die sondaers niet volghen, maer weest inder vreesen des Heeren alle den dach,

18

want ghy sult hope hebben int wterste, ende v verwachten en sal niet wechghenomen worden.

19

Hoort mijn sone, ende sijt wijs, ende scict v herte inden wech.

20

Ende wilt niet sijn in die maeltijden der dronckaerts, noch in die brasserien der gheender die vleesch om teten tsamen brenghen

21

⁺want die hen tot drincken stellen, ende ghelaghen te voren gheuen, sullen te niet ghaen, ende die slapernie sal met verschoerde cleedren ghecleedt worden.

+ C

22

Hoort uwen vadere die v ghewonnen heeft, ende en versmaet v moeder niet als sij oudt gheworden is.

23

Coept die waerheyt, ende en wilt gheen wijsheyt vercoopen, ende leeringe, ende verstandenisse.

24

Die vader vanden rechtuerdighen verhuecht hem met blijscappen, die eenen wijsen gewonnen heeft, sal in hem verblijt worde,

25

laet uwen vader blijde sijn en v moeder, ende laetse vrolijck sijn die

[p. *504]

v ghebaert heeft.

26

Mijn sone gheeft my v herte, ende laet v ooghen mijn weghen bewaren,

27

want een diepe grachte is een ghemeyn vrouwe, ende eenen enghen put is een vreemde vrouwe,

28

sij leyt laghen opden wech ghelijck een mordenaer ende wie sij onuerhoets siet, die sal sij dooden.

29

Wie heeft wee? ende wiens vader heeft wee? wie heeft kijuagien? wiens sijn die grachten? wiens sijn die wonden sonder sake? wie heeft die donckerheyt der ooghen?

30

en sijn die niet der gheender die inden wijn woonen, ende naersticheyt doen om croesen wt te drincken?

31

⁺En aensiet den wijn niet als hy gheelachtich siet, als sijn verwe int ghelas blincket, hy gaet suetelijck in,

+ D

32

maer ten eynde sal hy bijten als een slanghe, ende ghelijck een basiliscus sal hy sijn venijn wtstorten.

33

V ooghen sullen vreemde vrouwen sien, ende v herte sal verkeerde dinghen spreken.

34

Ende ghy sult sijn als slapende int midden vander zee, ende als een ontslapen stierman diet roer verloren heeft,

35

ende ghy sult segghen. Sij hebben my gheslaghen, ende ten heeft my niet wee ghedaen, sy hebben my ghetrocken, ende ick en hebs niet ghevuelt. Wanner sal ick ontwaken, ende wederom wijn vinden?