Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺BEter is eenen goeden naem dan veel rijcdommen, bouen siluer ende gout is een goede gratie.

+ A

2

Die rijc ende die arme sijn malcanderen te ghemoete comen, den scepper van hen beyden is die Heere.

3

Een listich mensch siet dat quaet ende hy verbercht hem, die onnoosele is doorghegaen ende wert ghequelt met scaden.

4

Het eynde vander sedicheyt is die vreese des Heeren, rijcdommen, ende glorie, ende leuen.

5

Wapenen ende sweerden sijn inden wech des verkeerden, maer die behoeder sijnder zielen gaet verre van hen.

6

Het is een ghemeyn segwoort, een ionghelinc by sijnen wech, ooc als hy out gheworden is en sal hi daer af niet gaen.

7

Die rijcke gebiet den armen, ende wie ontleent die is een dienaer des gheens die leent.

8

Die boosheden saeyet sal quade dinghen maeyen, ende met die roede van sijnder gramscappen sal hy voleynt worden.

9

⁺Die gheneycht is tot bermherticheyt sal ghebenedijt worden, want van sijnen brooden heeft hy den armen ghegheuen. Victorie ende eere sal hy vercrijghen die gauen gheeft, want hy neemt wech die ziele der gheender diese ontfanghen.

+ B

10

Drijft wt den spotter ende met hem sal die kijuagie wtgaen, ende de twistighe saken ende spijtich verwijt sullen ophouden.

11

Wie des herten suyuerheyt bemint die sal om die gratie sijnder lippen den coninc te vrinde hebben.

12

Die ooghen des Heeren bewaren die kennisse, ende die woorden vanden boosen worden omgheworpen.

13

Die traghe seyt daer is eenen leeuw inden wech, int midden der straten sal ick ghedoot worden.

14

Een diepe grachte is den mont van een vreemde vrouwe, op den welcken die Heere gram is die sal daer in vallen.

15

⁺Die sotheyt is ghebonden en eens kints herte, ende die roede der castijnghen sal die wtdrijuen.

+ C

16

Wie eenen armen bedrieghelijck onrecht doet om sijn rijcdommen te vermeerderen, die salt selue oock eenen rijckeren gheuen ende ghebreck hebben.

17

Mijn sone neycht v oore ende hoort die woorden der wijsen, ende steldt v herte tot mijn leeringhe,

18

die v schoon sijn sal, als ghi die sult ghehouden hebben in uwen buyck, ende als die oueruloeden sal in v lippen

19

op dat inden Heere v betrouwen si, daerom heb icse v heden ghetoont.

20

Siet ick hebse v in drij manieren bescreuen, in die ghedachten, ende wetenheyt,

21

om dat ick v soude toonen die uasticheyt, ende die wtspraken der waerheyt, dat ghy soudt wt dese antwoorden den ghenen die v ghesonden hebben.

22

⁺En doet gheen ghewelt den armen omdat hy arm is, noch en verdruct den behoeuighen in die poorte niet.

+ D

23

Want die Heere sal sijn sake ordeelen, ende hy salse doorsteken die sijn ziele doorsteken hebben.

24

En wilt gheen vrint sijn van eenen grammoedighen man, noch en wandelt niet met eenen rasenden man,

25

dat ghy by auontueren sijn paden niet en leert ende uwer zielen verargeringe neemt.

26

En wilt niet sijn met die ghene die hen handen vestighen, ende die hen seluen stellen tot borgen voor sculden,

27

want eest dat ghi niet en hebt waer mede dat ghyt betalen moecht, wat nootsake eest dat hy een decsel neme wt uwer slaepcameren?

28

En gaet niet ouer die oude palen die uwe vaders ghestelt hebben,

29

Hebdi eenen man ghesien rasch in sijn werck? die sal voor coninghen staen, ende hy sal voor die onedele niet sijn.