Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺GHelijck die deylinghen der wateren alsoo is eens conincs herte in des Heeren hant, werwaerts dat hy wilt sal hy dat neyghen.

+ A

2

Alle weghen eens mans duncken hem oprecht te sijne, maer die Heere weghet die herten.

3

Bermherticheyt ende ordeel te doen behaecht den Heere meer dan slachofferanden.

4

Dat verheffen der ooghen is een verbreyden des herten, dat lichtuat der ongoddelijcker is sonde.

5

Die ghedachten vanden vromen sijn altijt in oueruloedicheyt, maer alle traghe is altijt in armoede.

6

Wie scatten vergadert met een loghen tonghe, die is ydel ende onuerstandich, ende hy sal ghestooten worden tot die stricken der doot.

7

Die roouen der ongoddelijcker sullen hen aftrecken, om dat sij gheen ordeel en hebben willen doen.

8

Eens mans verkeerden wech is vreemt, maer wie suyuer is diens werck is oprecht.

9

⁺Tis beter te sitten in eenen hoeck vanden huyse dan met een kijfachtighe vrouwe ende in een ghemeyn huys.

+ B

10

Die ziele vanden ongoddelijcke begeert quaet, si en sal haers naesten niet ontfermen.

11

Als die boose mensch ghestraft wort, so sal tcleyn kint wijser sijn, ende eest dat eenen wijsen volcht, soo salt wetenheyt crijghen.

12

Die rechtuerdighe versiert van des ongoddelijcken huys, op dat hy die ongoddelijcke van tquaet soude moghen trecken.

13

Wie sijn oore stopt totten roep vanden armen, die sal ooc roepen, ende en sal niet verhoort worden.

14

Een verborghen ghifte bluscht die gramschappen, ende die gaue inden schoodt, die seer groote verbolghentheyt.

15

Een blijscap eest den rechtuerdighen rechtuerdich ordeel te doen, ende eenen grouwel den ghenen die boosheyt doen.

16

Een man die doelt vanden wech der leeringhen, die sal in die vergaderinghe der ruesen woonen.

17

⁺Wie lecker spijsen bemint die sal in armoede wesen, ende wie wijn ende vette spijsen lief heeft, die en sal niet rijck worden.

+ C

18

Voor eenen rechtuerdighen sal die ongoddelijcke ghegheuen worden, ende voor die oprechte, een boose.

19

Tis beter te woonen in een verlaten landt, dan met een

[p. *503]

kijfachtighe ende grammoedighe vrouwe,

20

Eenen begheerlijcken scadt, ende olie is in die wooninghe vanden rechtuerdighen, ende een onwijs mensch sal dat verstroeyen.

21

Wie rechtuerdicheyt ende bermherticheyt volcht, die sal vinden leuen, rechtuerdicheyt, ende glorie.

22

Die stadt van die stercke heeft een wijse beclommen, ende hy heeft bedoruen die stercte van haer betrouwen.

23

Wie sijnen mont bewaert ende sijn tonghe, die bewaert sijn ziele van benautheden.

24

⁺Die hoouerdighe ende vermetelijcke wort ongheleert gheheeten, die in gramscap houerdie bedrijft,

+ D

25

Die begheerten dooden den traghen, want sijn handen en hebben niet willen wercken.

26

Den gheheelen dach wenscht ende begheert hy, maer die rechtuerdich is sal gheuen, ende niet ophouden.

27

Die offeranden der ongoddelijcker sijn afgrijselijc, die gheoffert worden van seer quade wercken.

28

Een loghenachtich ghetuyghe sal vergaen, een onderdanich man sal victorie spreken.

29

Een ongoddelijck man vesticht sijn aensicht spijtelijck, maer die oprecht is die betert sijnen wech.

30

Daer en is gheen wijsheyt, daer en is gheen voorsichticheyt, daer en is gheenen raet teghen den Heere.

31

Dat peert wort bereydt teghen den dach des strijdts, maer die Heere gheeft die salicheyt.