Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺DEn wijn is een dinck vol oncuyscheyts, ende dronckenscap is een oproerich dinc, so wie daer in genoechte heeft die en sal niet wijs wesen.

+ A

2

Ghelijc dat briesschen van eenen leeuw, soo is die veruaerlijcheyt des conincs, die hem verwect tot gramscap die sondicht tegen sijn ziele.

3

Tis den mensch eere die hem sceyt van twistighe kijuagien, maer alle dwasen worden ghemenghet met scimpernien.

4

Om die couwe en heeft die traghe niet willen ackeren, daerom sal hy des somers broot bidden, ende men en sals hem niet gheuen.

5

Ghelijc een diep water alsoo is den raet in eens mans herte, maer een wijs mensch sal dien wt putten.

6

Veel menschen worden bermhertich ghenoemt, maer wie sal eenen ghetrouwen man vinden.

7

⁺Een rechtuerdighe die in sijn simpelheyt wandelt, sal salighe kinderen achter hem laten.

+ B

8

Een coninck die opden stoel des ordeels sidt, verstroeyt alle tquaet met sijnen aensiene.

9

Wie mach segghen mijn herte is suyuer, puer ben ic van sonde?

10

Ghewichte ende ghewichte, mate ende mate, beyde eest vereysinghe bi Gode.

11

Wt sijnen beneerstinghen wort een kint verstaen, oft sijn wercken suyuer ende oprecht sijn.

12

Een hoorende oore, ende een siende ooghe, die Heere heeftse beyde ghemaect.

13

En wilt den slaep niet liefhebben dat v die armoede niet en verdrucke, doet v ooghen open ende wort veruult met brooden.

14

Tis quaet, tis quaet, seyt alle cooper, ende als hy wechghegaen is dan sal hy hem beroemen.

15

Daer is gout ende menichte van costelijcke steenen, maer een costelijc vat sijn die lippen der wetenheyt.

16

⁺Neemt wech tcleet des gheens die borghe gheweest is voor den vreemden, ende voor die buyten luyden neemt den pant wech van hem.

+ C

17

Suet is den mensch het broot der loghenen, ende na maels sal sijnen mont veruult worden met gruyse.

18

Die ghedachten sullen met raden ghesterct worden, ende met regimenten behooren die orloghen ghehanteert te worden.

19

Met den ghenen die verborghen raden ontdect, ende bedriechelijck wandelt, ende sijn lippen wijde open doet en menghet v niet.

20

Die sijnen vader ende moeder veruloect, diens lampe sal wtgheblasen worden int midden der duysternissen.

21

Een erffenisse waer toe ghehaest wort int beghinsel, die sal int laetste die ghebenedijdinge deruen.

22

En segt niet ic sal quaet weder gheuen, verbeyt den Heere, ende hy sal v verlossen.

23

⁺Ghewicht ende ghewicht is een afgrijselijcheyt voor den Heere een valsche waghe en is niet goet.

+ D

24

Vanden Heere worden eens mans ganghen beschickt, want wie isser vanden menschen die sijnen wech verstaen can?

25

Tis den mensch eenen val den heylighen belouen, ende nae die beloften weder roepen.

26

Een wijs coninck verstroeyt die ongoddelijcke, ende buycht ouer hen eenen ghewelfden boghe der triumphen.

27

Des Heeren lichtuat is des menschen adem, die welck ondersoect alle die verborghentheyt des buycs.

28

Die bermherticheyt ende waerheyt bewaeren den coninck, ende door goedertierenheyt wort sijnen throon gheuesticht.

29

Dat verhueghen der ionghelinghen is hen stercheyt, endie weerdicheyt der ouderen is grijsheyt des hayrs.

30

Die blauwicheyt der wonden sal quade dinghen afvaghen, ende quetsueren int heymelijcste des buycs.