Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺DIt sijn oock die parabelen van Salomon die welcke ouerghesedt hebben die mannen van Ezechias den coninck van Iuda.

+ A

2

Tes die glorie Godts het woert te verborghen, ende die glorie der coninghen is die redene te ondersoecken.

3

Den hemel bouen ende die eerde beneden, ende therte der coninghen is ongrondelijck.

4

Neemt den roest vant siluer, ende daer sal een aldersuyuerste vat wt comen,

5

neempt die ongoddelijckeyt van des conincs aensicht ende sijnen throon sal doer die rechtuerdicheyt gheuesticht worden.

6

En vertoont v niet glorioes voer den coninck ende in die plaetse der grooter en staet niet,

7

want tes beter dat v gheseyt worde. Climt herwaerts op, dan dat ghy vernedert wordet voer den prince.

8

Dat v ooghen ghesien hebben en wilt dat niet lichtelijck int ghekijf voertsbrenghen, op dat ghijt namaels niet en soudt connen ghebeteren als ghy uwen vrient onteert soudt hebben.

9

⁺V sake tracteert met uwen vrint, ende v verholentheyt en openbaert den vreemde niet

+ B

10

dat hy bijanontueren v niet en bespotte als hijt ghehoort heeft, ende niet op en houde v te verwijten. Die gratie ende vrientscap verlossen, die welcke bewaert voer v, op dat ghy niet versmadelijck en wort,

11

Als gulden appelen in silueren bedden, is hy die een woert spreect te sijnen tijde,

12

Als een gulden oor cieraet ende een blinckende peerle is hy die eenen wijsen berispt ende een onderdanighe oore.

13

Ghelijc die couwe vanden sneu in den dach des oochst, alsoe is een ghetrouwe bode hem dien wtghesonden heeeft, sijn ziele doet hy rusten,

14

Als wolcken ende wint ende gheen reghenen daer nae volghende, is een beroe-

[p. *505]

melijck man, ende sijn beloften niet volbringhende.

15

Doer verduldicheyt sal een prince versacht worden, ende een sachte tonghe sal die hardicheyt in stucken breken.

16

Hebdi honich vonden soe etes dat v ghenoech sij, dat ghy bijauontueren versaedt sijnde dat niet wt en braket.

17

⁺Trect uwen voet aff van ws naesten huys, op dat hy bijauontueren versaet wesende v niet en hate.

+ C

18

Als eenen scicht, ende een sweert, ende eenen scerpen pijl, es een mensch die teghen sijnen naesten valsch ghetuyghenis seyt.

19

Als eenen verrotten tant ende eenen moeden voet is hy die hem verlaet op eenen onghetrouwen in den dach der benautheden,

20

ende verliest den mantel inden dach der couden. Als edick in weede asschen is hy die liedekens singhet den boosen herten. Ghelijc die motte den cleede, ende den worm den houte, alsoo let eens mans droeffheyt der herten.

21

Eest dat v viant hongher heeft soo spijst hem, eest dat hy dorst heeft soe gheeft hem water te drincken,

22

want ghy sult vierighe colen vergaderen op sijn hooft, ende die Heere sal v wederloonen.

23

Den noorden wint verdrijft die reghenen, ende een suer aensicht verdrijft een achterclappende tonghe.

24

⁺Tes beter te sitten inden hoeck vanden huyse, dan met een kijfachtighe vrouwe ende in ghemeyn huys.

+ D

25

Cout water eender dorstigher zielen, ende een goede bode van verren lande.

26

Als een fonteyn metten voete gheroert, ende een vervuylde adere is die rechtuerdighe vallende voer eenen ongoddelijcken.

27

Ghelijck hem die veel honichs etet dat niet goet en is, alsoo oock die een ondersoecker is der maiesteyt, sal vander glorien verdruct worden.

28

Ghelijck een open stadt ende sonder omganck der mueren, alsoo is een man die int spreken sijnen gheest niet bedwinghen en can.