Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺OOrsaken soect hy die van sijnen vrindt scheyden wilt, tot allen tijden sal hy versmadelijc sijn.

+ A

2

Een sot en ontfanct die woorden der wijsheyt niet, ten sij dat ghy segghet tghene dat in sijn herte verkeert.

3

Die ongoddelijcke mensch, als hy in diepte der sonden comen is, soo sal hy versmaden, maer hem volghen den laster ende tverwijdt.

4

Diep water sijn die woorden wt eens mans mont, ende die fonteyne der wijsheyt, is een oueruloedende beke.

5

Den persoon vanden ongoddelijcken wt te nemen en is niet goet, dat ghy soudt afwijcken van die waerheyt des ordeels.

6

⁺Die lippen vanden sot menghen hen met twisten ende sijnen mont verwect kijuagien.

+ B

7

Den mont vanden dwasen is sijn verderffenisse, ende sijn lippen sijn den val sijnder zielen.

8

Die woorden van eenen die met twee tonghen spreect sijn al oft sij slecht waren, ende sij comen tot dat binnenste des buycks. Die vreese worpt den traghen neder, maer die zielen der verwijfder mannen sullen hongher lijden.

9

Die saecht ende slap is in sijn wercken, die is een broeder des gheens die sijn eyghen wercken bederft.

10

Eenen alderstercsten torre is den naem des Heeren, tot dien loopt die rechtuerdighe, ende hy sal verheuen worden.

11

⁺Dat goet vanden rijcken is die stadt sijnder macht, ende als eenen stercken muer hem omringhende.

+ C

12

Het herte van eenen mensch wort verhauen eert gheplet wort, ende eer dat gheglorificeert wort so wordet vernedert.

13

Die antwoort eer hi ghehoort heeft, die thoont dat hy dwaes is, ende weert bescaemt te sijne.

14

Eens mans gheest onderhoudt sijn crancheyt, maer den gheest die lichtelijck gram wort, wie sal dien connen verdraghen?

15

Een wijs herte sal die wetenheyt besitten, ende die oore der wijsen soect leeringhe.

16

Des menschen ghifte maect sijnen wech breedt, ende voor die princen maket hem ruymte.

17

Een rechtuerdich mensch besculdicht ierstmael sij seluen, sijn vrient coemt, ende die sal hem ondersoecken.

18

Het lodt legt die twisten neder, ende tusschen die machtige ondersceydet ooc.

19

⁺Een broeder die van sijnen broeder gheholpen wordt, is ghelijck een vaste stadt ende die ordeelen als grendelen der steden.

+ D

20

Van des mans mont vruchten sal sijnen buyck gheuult worden, ende die spruyten van sijnen lippen sullen hem versaden.

21

Die doodt ende dleuen sijn in die hant vander tonghen, die haer lief hebben, sullen haer vruchten eten.

22

Wie een goede vrouwe vint die vint goet, ende die sal vrucht sceppen vanden Heere. Die een goede vrouwe wech iaecht, die verdrijft dat goet, maer die een ouerspeelster houdt die is dwaes ende onwijs.

23

Met smeekende ghebede spreect een arme, ende een rijcke sal straffelijck wt spreken.

24

Een vriendelijck man totten gheselschappe, sal meerder vrient wesen dan een broeder.