Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺BEter is eenen drooghen bete met blijscappen, dan een huys vol gheslaghender beesten met kijuagien.

+ A

2

Een wijs knecht sal heerschappie hebben ouer sotte kinderen, ende tusschen die broeders sal hy die erffelijcheyt deylen.

3

Ghelijc doort vier tsiluer gheproeft wort, ende tgout door tfornays, alsoo proeft die Heere die herten.

4

Die quade is onderdanich der booser tonghen, ende die bedrieghelijcke is ghehoorsaem den lieghenden lippen.

5

Die eenen armen versmaedt, die bescimpt sijnen scepper, ende die hem van eens anders valle verblijt en sal niet onghecastijt wesen.

6

Der ouders croone sijn der kinder kinderen, ende die glorie der kinderen sijn hen vaderen.

7

⁺Den dwasen en betamen gheen wel ghescickte woorden, noch eenen prince een loghen-

+ B

[p. *501]

achtighe lippe.

8

Een alder ghenaemsten peerle is tverwachten des verbeyders, werwaerts dat hy hem keert verstaet hijt wijselijc.

9

Wie de misdaet verborgt, die soect vrintscappen die met een ander woort verhaelt, die sceyt die vereenichde.

10

Meer vordert dat berispen aen eenen verstandighen, dan hondert slaghen aen eenen sot.

11

Altijt soect die quade kijuagien, maer den wreeden enghel sal teghen hem ghesonden worden.

12

⁺Tis beter eender beyrinnen te ontmoeten als haer ionghen gherooft sijn, dan eenen dwaes die hem seluen betrout op sijn dwaesheyt.

+ C

13

Wie quade dinghen voor goede weder gheeft, van diens huyse en sal tquaet niet affscheyden.

14

Die dwater wt laet, is een hooft der kijuagien, ende eer hy scande lijdt soo verlaet hy trecht ordeel.

15

Wie den ongoddelijcken rechtuerdich seyt te wesen, ende die den rechtuerdighen verdoemt, die sijn beyde afgrijselijc voor den Heere.

16

Wat bater den sot rijcdommen te hebben, als hi die wijsheyt niet coopen en mach. Wie sijn huys hooch maect die soect den val, ende die scouwet te leeren sal in quaet vallen.

17

Tot allen tijden heeft hy lief die vrint is, ende een broeder wort in die benautheden gheproeft.

18

Een sot mensch sal metten handen tsamen staen, als hy borghe bleuen is voor sijnen vrint.

19

⁺Wie tweedracht versint, die bemint kijuagien, ende die sijnen mont verheft die soect neder te vallen.

+ D

20

Een die verkeert van herten is en sal gheen goet vinden, ende die sijn tonghe keert sal in quaet vallen.

21

Een sot is gheboren te sijnder scanden, ende die vader en sal hem ooc in den sot niet verblijden.

22

Eenen blijden moet maect een bloeyende iuecht, eenen droeuen gheest verdroocht dat ghebeente.

23

Die ongoddelijcke neemt gauen wten schoodt, om dat hy verkeeren soude die paden des ordeels.

24

Int aensicht van eenen dwasen schijnt claer die wijsheyt, die ooghen der dwasen sijn in die eynden der eerden.

25

Een dwaes kint is des vaders gramscap, ende eenen rouwe des moeders die hem ghebaert heeft.

26

Ten is niet goet scade doen eenen rechtuerdighen, nocht oock slaen den prince die recht ordeel doet.

27

Wie sijn woorden manierlijck beleyt, die is gheleert ende voorsichtich, ende een gheleert man is van costelijcken gheeste.

28

Eest dat een die oock sot is swijcht, soo sal hy voor wijs gheacht worden, ende verstandich eest dat hy sijn lippen bedwingt.