Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺HEt behoort den mensche toe het herte te bereyden, ende den Heere die tonghe te regeren.

+ A

2

Alle die weghen des mensche sijn openbaer sijnen ooghen, der gheesten wegher is die Heere.

3

Openbaert den Heere v wercken, ende v ghedachten sullen te rechte bescict worden.

4

Alle dinghen heeft die Heere om sij seluen ghemaect, ende den ongoddelijcken totten quaden dach.

5

Een afgrijselijcheyt des Heeren sijn alle die vermetelijcke, oock al waer die hant by die hant, soo en sal hy niet onnoosel sijn.

6

Het beghinsel van eenen goeden wech is rechtuerdicheyt doen, ende die is voor Gode ghenamer dan slachofferanden te offeren. Door die bermherticheyt ende warachticheyt wort verlost die boosheyt, ende in die vreese des Heeren wijctmen van tquaet.

7

Als den Heere ghenoeghen die weghen van eenen mensch, soo sal hy sijn vianden oock tot vrede bekeeren.

8

⁺Beter is een luttel met rechtuerdicheyt, dan veel vruchten met boosheyt.

+ B

9

Het herte vanden mensche beschict sijnen wech, maer des Heeren eest sijn ganghen te bescicken.

10

Die waersegghinghe is in des conincs lippen, int ordeel en sal sijnen mont niet dolen.

11

Ghewicht ende waghe sijn des Heeren ordeelen, ende sijn wercken sijn alle die steenen der werelt.

12

Afgrijselijck sijn sij den coninck die ongoddelijc doen, want door die rechtuerdicheyt wort den rechterstoel gheuesticht.

13

Den wille der coninghen sijn rechtuerdighe lippen, die oprechte dinghen spreect sal te recht bescict worden.

14

Des conincs verbolghentheyt sijn boden der doot, ende een wijs man sal die te vreden stellen.

15

⁺In die vrolijcheyt van des conincks aensicht is dat leuen, ende sijn ghenadicheyt ghelijck eenen auont reghen.

+ C

16

Besidt wijsheyt want sij is beter dan gout, ende crijcht voorsichticheyt, want sij costelijcker is dan siluer.

17

Den padt vanden rechtuerdighen wijct aff van tquaet, een bewaerder sijnder zielen bewaert sijnen wech.

18

Voor die vernielinghe gaet hoouerdie, ende voor den val wort den gheest verhauen.

19

Tis beter verootmoedicht te worden metten saechtmoedighen, dan roouen te deylen metten hoouerdighen.

20

Een die gheleert is int woort, sal goede dinghen vinden, ende wie inden Heere hoept, die is salich.

21

Die wijs van herten is sal voorsienich ghenoemt worden, ende die soet van wtspraken is, sal noch meerder dinghen vinden.

22

Een fonteyn des leuens is die gheleertheyt des besitters, die leeringhe der sotten is dwaesheyt.

23

Het herte vanden wijsen sal sijnen mont leeren, ende sijnen lippen salt gratie toe gheuen.

24

⁺Huenichraten sijn wel ghescicte woorden, die sueticheyt der zielen is die ghesontheyt der beenderen.

+ D

25

Daer is eenen wech die den menschen schijnt recht te sijne, ende sijn wterste leyden ter doot.

26

Die ziele vanden ghenen die arbeydt, arbeyt voor haer seluen, want sijnen mont heeft hem ghedwonghen.

27

Een ongoddelijck man graeft dat quaet, ende in sijn lippen wert een vier ontsteken.

28

Een verkeert mensch verwect kijuagien, ende een mensch van veel woorden sceydt die princen.

29

Een boos man vertreyfelt sijnen vrint, ende leydt hem door eenen wech die niet goet en is.

30

Die met verbaesden ooghen verkeerde dinghen peyst, bijtende sijn lippen volbringt hy tquaet.

31

Een croone der weerdicheyt is die ouderdom, die in die weghen der rechtuerdicheyt sal gheuonden worden.

32

Beter is een verduldighe dan een sterck man, ende die sijns moets Heere is, dan een verwinner der steden.

33

Die loten worden inden schoodt gheworpen, maer vanden Heere worden sij wtghedeylt.