Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺EEn saechte antwoorde breect die gramscap een hart woort verwect heeten torn.

+ A

2

Die tonghe der wijsen verciert die wetenheyt, den mont der dwasen worpt sotternie op.

3

In allen plaetsen aenscouwen die ooghen des Heeren, die goede ende quade.

4

Een vreedmakende tonghe is thout des leuens, maer die onghemaniert is sal den gheest vernielen.

5

Een dwaes bespot sijns vaders onderwijsinghe, maer wie berispinghen bewaert sal scalcker werden. In oueruloedighe rechtuerdicheyt is die meeste duecht, maer die ghedachten der ongoddelijcker sullen wtgheroyet worden.

6

Het huys vanden rechtuerdighen is seer veel stercheyts, ende in die vruchten vanden ongoddelijcken is verstooringhe.

7

Die lippen der wijsen sullen die wetenheyt breedt saeyen, het herte der dwasen sal onghelijck sijn.

8

⁺Die slachofferanden der ongoddelijcker sijn afgrijselijck voor den Heere, die beloften der rechtuerdigher sijn versoenlijck.

+ B

9

Den wech des ongoddelijcken is den Heere afgrijselijck, die rechtuerdicheyt volcht, wort van hem bemint.

10

Quaet is die leeringhe der gheender die den wech des leuens verlaten, wie straffinghen haet die sal steruen.

11

Die helle ende die verderffenisse sijn voor den Heere, hoe veel te meer die herten van die kinderen der menschen.

[p. *500]

12

Die bederuer van andere en bemint dien niet die hem straft, noch hy en gaet totten wijsen niet.

13

Een vrolijc herte maect een blijde aensicht, inden druck des herten wort den gheest neder gheworpen.

14

Het herte vanden wijsen soect leeringhe, ende den mont der dwasen wort gheuoet met onwetenheyt.

15

Alle die daghen des arme sijn quaet, een vrij herte is ghelijck eenen gheduerighen maeltijt.

16

Tis beter een luttel metter vreesen des Heeren, dan groote scatten ende onuersadelijck.

17

Tis beter ghenoodt te sijn tot moes met liefden, dan tot een ghemest calf met hate.

18

⁺Een toornich man verwect kijuagien, die verduldich is stilt die twisten die opgheresen sijn.

+ C

19

Den wech der traghen sijn als eenen thuyn van doornen, den wech der rechtuerdigher is sonder struycsele.

20

Een wijs kint verblijdt den vader, ende een sot mensch versmaedt sijn moeder.

21

Die sotternie is den sot een blijscap, ende een voorsichtich man bescict te rechte sijnen wech.

22

Die ghedachten worden verstroeyt daer gheenen raet en is, maer daer vele raetsluyden sijn, worden die gheuesticht.

23

Die mensch verblijdt hem in die redene sijns monts, ende een redene ten bequamen tijde is dalderbeste.

24

Den padt des leuens is ouer den gheleerden, op dat hy afkeeren soude van die wterste helle.

25

Thuys vanden hoouerdighen sal die Heere af breken, ende hy sal die palen der weduwen vast maken.

26

⁺Een afgrijselijcheyt sijn den Heere die quade ghedachten, ende een puer redene dalderschoonste sal van hem gheuesticht worden.

+ D

27

Hy verstoort sijn huys die ghiericheyt volcht, maer wie ghiften haet die sal leuen.

Door bermherticheyt ende ghelooue worden die sonden ghesuyuert, maer door die vreese des Heeren soo wijct een ieghelijck van tquaet.

28

Therte des rechtuerdighen sal ghehoorsaemheyt ouerdencken, den mont der ongoddelijcken stordt quade dinghen wt.

29

Verre is die Heere vanden ongoddelijcken, ende die ghebeden der rechtuerdigher sal hy verhooren.

30

Dlicht der ooghen sal die ziele verblijden, een goede fame salt ghebeente vet maken.

31

Een oore die straffinghen des leuens hoort, sal int midden der wijser woonen.

32

Wie onderwijsende castijnghe verworpt die versmaedt sijn ziele, maer wie nae straffinghen hoort die is een besitter des herten.

33

Die vreese des Heeren is een leeringhe der wijsheyt, ende voor die glorie gaet ootmoedicheyt.