Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺EEn wijse vrouwe timmert haer huys, ende een onwijse sal metten handen bederuen datter ghetimmert was.

+ A

2

Wie den rechten wech wandelt ende God vreest, die wort versmaet van hem die den scandelijcken wech wandelt.

3

In des sots mont is die roede der hoouerdien, maer die lippen der wijsen sullen henlieden bewaren.

4

Daer gheen ossen en sijn, daer is die cribbe ydel, maer daer veel graens is daer is openbaer kenlijck die stercheyt vanden osse.

5

Een ghetrou ghetuyghe en sal niet lieghen, maer een bedrieghelijck ghetuyghe brengt lueghenen voorts.

6

Die spotter soect wijsheyt ende hy en vintse niet, die leeringhe der voorsichtigher is licht.

7

Gaet teghen eenen sotten man, ende hi en kent die lippen der voorsichticheyt niet.

8

Die wijsheyt vanden scalcken, is sijnen wech verstaen, ende die onuersienicheyt der dwasen is dolende.

9

⁺Een sot bespodt die sonde, ende tusschen die rechtuerdighe sal die gratie blijuen woonende.

+ B

10

Therte dat die bitterheyt sijnder zielen kent, in diens blijscap en sal gheen vreemde ghemenghet worden.

11

Thuys der ongoddelijcker sal te niet ghedaen worden, die tabernakelen der rechtuerdigher sullen groeyen.

12

Daer is eenen wech die den mensch schijnt rechtuerdich te sijn, ende die wterste van dien brenghen totter doot.

13

Dat lachen sal met druck ghemenghet worden, ende het wterste der blijscap wort met screyen beuaen.

14

Met sijnen weghen sal een dwaes veruult worden, ende ouer hem sal een goet man sijn.

15

Donnoosel ghelooft alle woorden, die cloecke bemerct sijn ganghen. Den bedrieghelijcken sone en sal niet goets wesen, des wijse knechts wercken sullen voorspoedich wesen, ende sijnen wech sal te recht bescict worden.

16

Die wijse vreest ende wijct aff van tquaet, die dwaes springt daer ouer, ende heeft betrouwen.

17

Die onuerduldich is sal dwaesheyt doen, ende een bedriechlijck man sal seer ghehaet worden.

18

Die cleyn kinderen sullen sotheyt besitten, ende die cloecke sullen wetenheyt verbeyden.

19

⁺Die quade sullen voor die goede ligghen, ende die ongoddelijcke voor die poorten der rechtuerdigher.

+ C

20

Een arm mensch sal sijnen naesten oock hatelijck wesen, maer der rijcker luyden vrinden sijn vele.

21

Wie sijnen naesten versmaet die sondicht, maer die des armen ontfermt sal salich wesen. Wie inden Heere ghelooft, die bemint bermherticheyt.

22

Sij dolen die quaet doen, die bermherticheyt ende waerheyt bereyden goede dinghen.

23

In alle goede wercke sal oueruloedicheyt sijn, maer daer seer veel woorden sijn daer is dicmael ghebreck.

24

Die croone der wijsen is hen rijckdom, die dwaesheyt der sotten is onvoorsienicheyt.

25

Een ghetrou ghetuyghe verlost die zielen, ende een dobbel gheueynst mensch brengt looghenen voorts.

26

In die vreese des Heeren is betrouwen der sterckheyt, ende sijnen kinderen sal hope sijn.

27

Die vreese des Heeren is een fonteyn des leuens, dat hy afsceyde van den val des doots.

28

⁺In die menichte des volcks is die weerdicheyt des conincks, ende in een luttel volcs is die scande des princen.

+ D

29

Die lijdtsaem is wort door veel voorsienicheyt gheregeert, maer die onlijdtsaem is verheft sijn sotheyt.

30

Dleuen des vleeschs is die ghesontheyt des herten, nijdicheyt is etter der ghebeenten.

31

Die den armen veronghelijct die bescimt sijnen scepper, ende hy eert hem die ontfermherticheyt doet den arme.

32

Door sijn boosheyt sal die ongoddelijcke wt ghestooten worden, maer die rechtuerdighe hoept in sijn doot.

33

Int herte vanden voorsichtighen rust die wijsheyt, ende alle ongheleerde sal hy onderwijsen.

34

Die rechtuerdicheyt verheffet tvolc, maer die sonde maect dat volc allendich.

35

Een verstandich knecht is den coninck aenghenaem, maer een onnut knecht sal sijn gramschap draghen.