Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MYn sone en vergheet mijn wet niet, ende v herte beware mijn gheboden,

+ A

2

want lanckheyt der daghen ende iaren des leuens, ende vrede sullen sij v aenbrenghen,

3

Bermherticheyt ende waerheyt en moeten v niet verlaten, doet die rontsomme v kele, ende bescrijftse in die tafelen ws herten,

4

ende ghy sult gratie ende goede leeringhen vinden voor Godt ende die menschen.

5

Hebt betrouwen inden Heere wt alle uwer herten, ende en wilt niet staen op v eyghen cloecheyt,

6

In allen uwen weghen soo peyst op hem, ende hy sal v ganghen bescicken,

7

En sijt niet wijs by v seluen. Vreest Godt ende wijct van tquaet,

8

want dat sal voorwaer ghesontheyt wesen uwen nauele, ende een veruersschinghe van uwen ghebeenten.

9

Eert den Heere van uwen goede, ende van die ierstelinghen alle uwer vruchten,

10

ende v schueren sullen veruult worden met versaetheden, ende v perssen sullen van wijn oueruloedich sijn,

11

⁺Mijn kint en verworpt die castijnghe des Heeren niet, noch en wilt niet cleynmoedich worden als ghy van hem ghestraft wort,

+ B

12

want den welcken die Heere lief heeft, dien straeft hy, ende ghelijck een vader in sijn kint, soo behaecht hy sij seluen.

13

Salich is die mensche die wijsheyt vint, ende die oueruloedich is van voorsichticheyt,

14

beter is tvercrijghen van die, dan die comenscap van gout ende siluer, haer vruchten sijn dierste ende aldersuyuerste,

15

si is beter dan alle rijckdommen ende alle datmen begheert, en mach by haer niet gheleken worden.

16

Lancheyt der daghen is in haer rechte hant, ende in haer slicke hant rijcdommen ende glorie,

17

Haer weghen sijn schoon weghen, ende alle haer paden sijn vreedtsamich,

18

Sij is een hout des leuens den ghenen diese aenueerden, ende diese behoudt is salich.

19

⁺Die Heere heeft door wijsheyt die eerde ghefundeert, ende die hemelen vast ghemaect met voorsienicheyt,

+ C

20

Door sijn wijsheyt sijn wtgheborsten die afgronden, ende die wolcken rinnen te samen met den dauwe,

21

Mijn sone en laet dit van v ooghen niet ontulieten. Bewaert die wet ende den raet,

22

ende tsal uwer zielen leuen wesen, ende gratie uwen mont,

23

dan suldy ghetrouwelijck wandelen in uwen wech, ende uwen voet en sal niet struyckelen,

24

eest dat ghi slaept soo en suldi niet vreesen, ghy sult rusten, ende uwen slaep sal suet sijn,

25

alsoo dat ghy niet en sult vreesen van onuersienlijcke veruaertheyt, ende der ongoddelijcker machten v oueruallende,

26

Want die Heere sal aen v sijde wesen, ende uwen voet bewaren dat ghy niet gheuanghen en wort.

27

⁺En wilt hem niet verbieden wel te doen diet vermach, eest dat ghy moecht, doet selue oock wel,

+ D

28

Noch en segt uwen vrint niet. Gaet henen ende coemt weder, ende morghen sal ict v gheuen, als ghijt terstont soudt moghen gheuen,

29

noch en bestaet gheen quaet teghen uwen vrint, als hy sijn betrouwen op v ghesteldt heeft.

30

En kijft tseghen niemant sonder sake, als hi v gheen quaet ghedaen en heeft.

31

En volcht niet nae den onrechtuerdighen mensch, noch en volcht sijn weghen niet,

32

want alle bespotter is den Heere een afgrijselijcheyt, ende metten simpelen is sijn sprake.

33

Armoede vanden Heere is int huys vanden ongoddelijcken, maer die wooninghen der rechtuerdighen sullen ghebenedijt worden,

34

hy sal die spotters bespotten, ende den saechtmoedighen sal hy gratie gheuen.

35

Glorie sullen die wijse besitten, dat verhueghen der dwasen is scande.