Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺MYn sone eest dat ghy mijn redenen ontfanghet, ende mijn gheboden by v verborght,

+ A

2

op dat v oore wijsheyt hoore, so neycht v herte om te bekennen die verstandicheyt,

3[2:4]

eest dat ghy die soect ghelijck ghelt, ende dat ghy die als scatten wtgraeft,

4[2:5]

dan suldi verstaen die vreese Gods, ende Gods kennisse vinden,

5[2:6]

want die Heere gheeft wijsheyt, ende wt sijnen mont comen verstandicheyt ende wetenheyt.

6[2:7]

Hy sal bewaren die salicheyt vanden oprechten, ende bescermen die ghene die simpelijck wandelen,

7[2:8]

⁺onderhoudende die paden der rechtuerdicheyt, ende der heylighen weghen bewarende,

+ B

8[2:9]

dan suldy verstaen die rechtuerdicheyt ende dat ordeel ende gherechticheyt, ende alle goede paden.

9[2:10]

Eest dat die wijsheit in v herte gaet ende dat die kennisse uwer zielen behaghet,

10[2:11]

soo sal den raet v bewaren, ende die voorsichticheyt v behouden,

11[2:12]

dat ghy sult verlost worden vanden quaden wech,

12[2:13]

ende vanden mensche die verkeerde dinghen spreect, die daer verlaten die rechte bane, ⁺ende wandelen door duyster weghen,

+ C

13[2:14]

die hen verblijden als sij qualijc ghedaen hebben, ende verhueghen hen in die quaetste dinghen,

14[2:15]

der welcker weghen verkeert sijn, ende hen ganghen van quade famen,

15[2:16]

Op dat ghy moecht verlost worden vander vreemder vrouwen, ende die van buyten is, die haer woorden saechte maect,

16[2:17]

ende verlaet den leytsman van haerder iongher iuecht, ende die tverbont haers Gods vergheten heeft,

17[2:18]

want haer huys is ter doot gheneycht, ⁺ende ter hellenwaerts haer paden,

+ D

18[2:19]

alle die tot haer ingaen die en sullen niet wederkeeren, noch sij en sullen die paden des leuens niet aennemen,

19[2:20]

Op dat ghy moecht wandelen inden goeden wech, ende die paden der rechtuerdigher bewaren,

20[2:21]

want die oprecht sijn sullen op die aerde woonen, ende die simpele sullen daer op blijuen woonende,

21[2:22]

Maer die ongoddelijcke sullen vander eerden vernielt worden, ende die booslijc doen sullen daer af ghenomen worden.