Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIT sijn die parabelen van Salomon Dauids sone den coninc van Israel,

+ A

2

om te weten wijsheyt ende onderwijsinghe,

3

om te verstaen die woorden der verstandicheyt, ende om te ontfanghen die onderwijsinghe der leeringhe, rechtuerdicheyt ende ordeel, ende gherechticheyt,

4

op dat den cleynen kinderen mach cloecheyt ghegheuen worden, den ionghelinc wetenheyt ende verstant.

5

Die wijse hoorende sal wijser worden, ende die verstandighe sal regimenten besitten,

6

Hy sal die parabele bemercken ende die beduydenisse, die woorden der wijsen ende hen doncker redenen.

⁺7

Die vreese des Heeren is tbeghinsel der wijsheyt.

Die dwase verachten die wijsheyt ende leeringhe.

+ B

8

Hoort mijn sone die leeringhe ws vaders, ende en verlaet die wet ws moeders niet,

9

op datter gratie tot uwen hoofde ghedaen worde, ende eenen halsbant aen uwen hals.

10

Mijn sone eest dat v die sondaers vertreyfelen en consenteert hen niet,

11

Eest dat si segghen. Coemt met ons laet ons den bloede laghen legghen, laet ons bedectelijck laghen legghen teghen den onnooselen sonder sake,

12

laet ons dien verslinden ghelijck die helle al leuende ende als gheheel nederdalende inden put.

13

Alderhande costelijck goet sullen wij vinden, wij sullen ons huysen vullen met roouen,

14

Worpet dlodt met ons, laet onser allen een borse wesen,

15

Mijn sone en wandelt met henlieden niet, weret uwen voet van haeren paden,

16

⁺want hen voeten loopen tot dat quaet, ende sij sijn haestich om bloet te storten.

+ C

17

Maer te vergheefs wordet een net ghespraeyt voor die ooghen der dieren die vederen hebben.

18

Ende sij legghen laghen teghen hen eyghen bloet, ende stellen voorts bedriechlijcheden teghen hen eyghen zielen,

19

alsoo sijn die paden van allen ghierighen mensche, si roouen die zielen der gheender die iet besitten.

20

Die wijsheyt predict buyten, op die straten gheeft si haer stemme,

21

aent hooft der scaren roept sij, in die doeren vander stadt poorten brengt si haer woorden voorts seggende.

22

Hoe langhe sult ghi cleyne die kintscheyt beminnen? ende hoe langhe sullen die dwase hen seluen scadelijcke dinghen begheren? ende die onwijse die wetenheyt haten?

23

Keert v omme tot mijnder berispinghen, siet ick sal v mijnen gheest voorts brenghen, ende ick sal v mijn woorden toonen,

24

want ick heb gheroepen, ende ghy hebbet gheweyghert, ick heb mijn hant wtghesteken, ende daer en was niemant die daer op sach.

25

⁺Ghy hebt alle mijnen raet versmaet, ende mijn straffinghen en hebdi niet gheacht,

+ D

26

Dus sal ick oock in v verderffenisse lachen, ende v bespotten,

27

als v, tghene dat ghy vreesdet, sal ouercomen sijn, als v ouercomen sal sijn een onuersienighe catiuicheyt, ende dat die verderffenisse v oueruallen sal als eenen stormende wint, als ouer v lieden comen sal die verdructheyt ende benautheyt.

28

Dan sullen sij my aenroepen, ende ick en salse niet aenhooren, smorghens vroech sullen sij opstaen ende my niet vinden,

29

om dat sij die leeringhe ghehaedt

[p. *494]

hebben, ende die vreese des Heeren niet en hebben ontfanghen,

30

noch niet gheuolcht en hebben mijnen raet, ende ghelastert hebben alle mijn straffinghen.

31

Hierom sullen sij die vruchten haers weechs eten, ende van haren raden sullen sij versaedt worden,

32

dat afkeeren der cleynder kinderen sal hen dooden, ende den voorspoet der dwaser salse bederuen,

33

Maer die my hoort sal sonder veruaertheyt rusten, ende oueruloedicheyt ghebruycken als alle vreese des quaets sal wechghenomen sijn.