Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺HOort kinderen die onderwijsinghe ws vaders, ende merct aen dat ghy voorsichticheyt moecht weten.

+ A

2

Een goede gaue sal ic v gheuen, en verlaet mijn wet niet,

3

want ic heb ooc mijns vaders sone gheweest, teederkens ende eenighe gheboren voor mijn moeder,

4

ende sij leerde my ende seyde. V herte ontfanghe mijn woorden, bewaert mijn gheboden, ende ghy sult leuen,

5

Besidt wijsheyt, besidt voorsichticheyt, en vergheet niet, noch en wijct niet af van die woorden mijns monts,

6

En verlaetse niet ende sij sal v bewaren, bemint haer ende sij sal v onderhouden.

7

Dbeghinsel der wijsheyt, besidt wijsheyt, ende in alle v besittinghe crijcht voorsichticheyt,

8

neemt die tot v, ende sij sal v verheffen, ghy sult van haer gheglorificeert worden, als ghy haer sult omhelst hebben,

9

⁺soo si sal uwen hoofde vermeerderinghen van gratien gheuen, ende met een heerlijcke croone sal si v ouerdencken.

+ B

10

Hoort mijn sone ende ontfanct mijn woorden, dat die iaren des leuens v moghen vermenichfuldicht worden,

11

Den wech der wijsheyt sal ick v thoonen, ic sal v leyden door die paden der gherechticheyt,

12

die welcke als ghy sult inghegaen sijn, soo en sullen v ganghen

[p. *495]

niet benauwt worden, ende loopende en suldi gheen struycsel hebben. Houdt die onderwijsinghe, en verlaetse niet, bewaertse, want sij is v leuen,

13

En hebt geen ghenoechte in die weghen der ongoddelijcker

14

noch en laet v niet behaghen den wech der quader.

15

⁺Vliet daer af, noch en gaet daer niet doere, Wijct af ende verlaet dien,

+ C

16

want sij en slapen niet, sij en hebben quaet ghedaen, ende den slaep en wort van haerlieden niet ghenomen, tensij dat sij iemant verdruct hebben

17

si eten tbroot der ongoddelijcheyt, ende drincken den wijn der boosheyt,

18

Maer den padt der rechtuerdigher als een blinckende licht gaet voorts, ende wast tot eenen volcomenen dach,

19

Den wech der ongoddelijcker is duyster, sij en weten niet waer sij vallen sullen,

20

Mijn sone vaet mijn redenen, ende tot mijn wtsprake neycht v oore,

21

en laetse van uwen ooghen niet gaen, bewaertse int midden ws herten,

22

Want sij sijn dleuen den ghenen diese vinden, ⁺ende allen vleesche ghesontheyt.

+ D

23

Met alder hoeden bewaert v herte, want daer wt roemt dat leuen,

24

Doet van v den verkeerden mont, ende die achterclappende lippen laet verre van v sijn,

25

Laet v ooghen sien dat recht is, ende v wimbrauwen laet voor v ganghen gaen,

26

Scict uwen padt recht met uwen voeten, ende allen v weghen sullen gheuesticht worden,

27

En wijct niet af ter rechter noch ter slincker sijden, keert uwen voet van tquaet, want die weghen die ter sijden sijn, kent die Heere, maer verkeert sijnse die ter slincker sijden sijn, Maer hy sal v loopen recht maken, ende v weghen sal hy in vrede verlenghen.