Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xlij. Psalm.

Domine exaudi.

1

HEere verhoort mijn gebedt, met uwen ooren soe vaet mijn claghelijck bidden in uwe waerheyt, verhoort my in v rechtuerdicheyt.

2

Ende en gaet niet int recht met uwen dienaer, want in v aensicht en sal gheen leuende gherechtuerdicht worden.

3

Want die viant heeft mijn ziele veruolcht, hy heeft in die eerde mijn ziele vernedert.

Hy heeft my ghestelt int doncker ghelijck die dooden der werelt,

4

ende mijnen gheest is beanxt gheweest op my, mijn herte is in my ontstelt worden.

5

Ick heb ghedachtich gheweest der ouder daghen, ick heb ouerdacht in allen v wercken, in die wercken uwer handen oeffende ick mijn ghepeysen.

[p. *491]

6

Ick heb mijn handen wtghereyct tot v, mijn ziele es voer v als eerde sonder water.

7

Heere verhoort my haestelijck, mijnen gheest es besweken.

En keert v aensicht van my niet, ende ick sal ghelijck sijn den ghenen die nederdalen inden put.

8

Doet my vroech hooren uwe bermherticheyt, want ick heb in v ghehoept.

Maect my kenlijck den wech daer ick in wandelen mach, want tot v heb ick myn ziele op ghehauen.

9

Verlost my van mijnen vianden Heere, tot v ben ick ghevloden,

10

leert my uwen wille doen, want ghy sijt mijn Godt.

Uwen goeden gheest sal my leyden in den rechten wech,

11

om uwen naem Heere suldi my leuende maken in v gherechticheyt.

Ghy sult mijn ziele van die tribulatie wtleyden,

12

ende doer v bermherticheyt suldi mijn vianden heel vernielen.

Ende ghy sult vernielen alle die mijn ziele verdrucken, want ick ben v dienaer.