Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xliij. Psalm.

Benedictus dominus Deus.

1

GHebenedijt sij die Heere mijn Godt, die mijn handen leert ten strijde, ende mijn vingheren ter orloghen.

2

Mijn bermherticheyt, ende mijn toevlucht, mijn ontfangher ende verlosser.

Mijn bescermer ende in hem heb ick ghehoept, die mijn volck my onderdanich maect.

3

Heere wat is die mensche dat ghy v hem te kennen gheeft? oft des menschen sone dat ghy hem acht?

4

Die mensch es der ydelheyt ghelijck worden, sijn daghen gaen voerbij als een scaduwe.

5

Heere neycht v hemelen, ende coemt nederwaerts, raect die berghen ende sij sullen rooken.

6

Blixemt, ende ghy sultse verstroyen sendt wt v pijlen, ende ghy sultse verstooren.

7

Sendt wt v handen vanden hooghen, trect my wt, ende verlost my van veel wateren, van die hant der vreemder kinderen.

8

Der welcker mont heeft ydelheyt ghesproken, ende hen rechte hant is een rechte hant der boosheyt.

9

Godt ick sal v eenen nieuwen sanck singhen, op een psalter spel van thien snaren sal ick v spelen.

10

Die den coninghen salicheyt gheeft, die Dauid uwen knecht verlost hebt, verlost mi vanden quaden sweerde.

11

Ende verlost my van die hant der vreemder kinderen, der welcker mont heeft ydelheyt ghesproken, ende hen rechte hant is een rechte hant der boosheyt.

12

Der welcker kinderen sijn ghelijck nieuwe plantsoenen in haer ioncheyt.

Hen dochteren sijn toeghemaect al om verciert, als die ghelijckenisse van eenen tempel.

13

Hen kelders sijn vol ouervloeyende, van deen in dander.

Hen scapen sijn vruchtbaer, ouervloedich in haer wtganghen,

14

hen runderen sijn vet.

Daer en is gheen veruallinghe der wanden, noch doerganck, noch gheroep in hen straten.

15

Salich hebben sij ghenoemt het volck dat dese dinghen heeft, salich is tvolck, wiens die Heere sijn sijn Godt is.