Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.iiij. Psalm.

Confitemini Domino, & inuoc.

1

BElijdt den Heere, ende aenroept sijnen naem, vercondicht onder die Heydenen sijn wercken.

2

Singt hem, ende singt hem lof, vertelt alle sijn wonderlijcheden.

3

Wort louende in sijnen heylighen naem, verblijden moet dat herte der gheender die den Heere soecken.

4

Soect den Heere, ende wort versterct, soect sijn aensicht altijt.

5

Weest ghedachtich sijnder wonderlijcker wercken die hy ghedaen heeft sijn wonderlijcke teekenen, ende die ordeelen sijns monts.

6

Ghy saet van Abraham sijns dienaers kinderen, Iacobs sijns wtuercorens.

7

Hy is die Heere onse Godt, in alle die aerde sijn sijn ordeelen.

8

Hy heeft ghedachtich gheweest inder eewicheyt sijns verbonts, des woorts dat hy beuolen heeft in dusentich gheslachten.

9

Dat hy ghemaect heeft tot Abraham, ende sijns eedt tot Isaac.

10

Ende hy heeft dat Iacob gestelt tot een ghebodt, ende Israel tot een eewich testament.

11

Segghende, v sal ick gheuen tlant van Chanaan, dat cordeken van uwer erffenissen.

12

Doen sij cleyn van ghetale waren, ende seer luttel des lant inwoonders.

13

Sijn sij door ghegaen van volcke te volcke, ende van deen rijcke tot een ander volck.

14

Hy en heeft gheenen mensch hen laten hinderen, ende hy heeft om haren wille coninghen ghestraft.

15

En wilt mijn ghesalfde niet raken, ende in mijn propheten en wilt gheen quaetheyt bedrijuen.

16

Ende hy heeft den hongher op die aerde gheroepen, ende alle donderstant des broots heeft hy vernielt.

17

Hy heeft voor hen eenen man ghesonden, tot eenen knecht is Ioseph vercocht gheweest.

18

Sij hebben met veteren sijn voeten ghedwonghen, yser is door zijn ziele ghegaen

19

tot dat sijn woort quam.

Die wtsprake des Heeren heeft hem ontsteken,

20

die coninck heeft ghesonden, ende hem ontbonden, die prince des volcs, ende heeft hem wt laten gaen.

21

Hy heeft hem ghestelt eenen prince sijns huys, ende een ouerste van alle sijn besittinghe.

22

Dat hy sijn princen onderwijsen soude als si seluen, ende sijnen ouders voorsienicheyt leeren.

23

Ende Israel is in Egipten ghegaen, ende Iacob is een vreemdelinck gheweest int lant van Cham.

24

Ende hy heeft het volck crachtelijck vermeerdert, ende hy heeftse stercker ghemaect dan hen vianden.

25

Hy heeft hen herte ommeghekeert, dat sij sijn volc haten souden, ende dat sij bedriechlijck doen souden tseghen sijn knechten.

26

Hy heeft Moysen sijnen dienaer ghesonden, Aaron den welcken hy vercoren hadde.

27

Hy heeft in hen die woorden van sijnen teekenen ghesteldt, ende der wonderlijcker wercken int landt van Cham.

28

Hy heeft duysternissen ghesonden, ende heuet doncker ghemaect, ende hy en heeft sijn woorden niet bitter ghemaect.

29

Hy heeft hen wateren in bloet verkeert, ende hen visschen heeft hy ghedoot.

30

Hen lant heeft vorschen voortghebracht, tot int binnenste van haerder coninghen huysen.

31

Hy heeft ghesproken, ende daer sijn hontsulieghen ghecomen, ende moesien in allen hen palen.

32

Hy heeft haren reghen tot haghel ghestelt, een verbrandende vier in hen lant.

33

Ende hy heeft hen wijngaerden gheslaghen, ende hen vijchboomen, ende heeft ghebroken die boomen van haren palen.

34

Hy heuet gheseyt, ende daer sijn sprinchanen ghecomen, ende rupsenen der welcker gheen ghetal en was.

35

Ende die hebben alle tgras in hen lant gheten, ende alle die vruchten van haren lande gheten.

36

Ende hy heeft alle dierste gheborene in hen landt gheslaghen, dierste vruchten van allen haren arbeyde.

37

Ende hy heeftse wtgheleyt met siluer ende gout, ende daer en was in haren gheslachten niemant sieck.

38

Egipten wert verblijdt in hen vertrecken, want haerlieder vreese was op hen gheuallen.

39

Hy heeft een wolcke wtghespreyt tot haren bescermen, ende een vier om dat hen des nachts soude lichten.

40

Sij hebben begheert ende daer sijn quackelen ghecomen, ende met hemels broot heeft hijse versaedt.

41

Hy heeft die steenrootse ghescoert, ende daer sijn wateren wt gheuloten, die vloeden sijn opt drooghe door gheloopen.

42

Want hy heeft ghedachtich gheweest sijns heylichs woorts, dwelck hy ghesproken heeft tot Abraham sijnen dienaer.

43

Ende hy heeft sijn volck wtgheleydt met verhueghen, ende sijn wtuercorene met blijscappen.

44

Ende hy heeft hen ghegheuen die lantscappen der Heydenen, ende der volcken arbeyden hebben sij beseten.

45

Om dat sij bewaren souden sijn rechtuerdicheden, ende sijn wet versoecken.