Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.v. Psalm.

Confitemini Domino.

1

BElijdt den Heere want hy is goet, want inder eewicheyt is sijn bermherticheyt.

2

Wie sal wtspreken die machticheden des Heeren? wie sal v doen hooren alle sijne louen.

3

Salich sijn sij die dat ordeel bewaren, ende rechtuerdicheyt doen tot allen tijden.

4

Weest onser ghedachtich Heere int welbehaghen ws volcs, besoect ons met v salicheyt.

5

Om te besien in die goetheyt uwer wtuercorenen, om blijde te sijn in die blijscap ws volcks, op dat ghy moecht gheloeft worden met v erffelijcheyt.

6

Wij hebben ghesondicht met onsen vaderen, wi hebben onrechtuerdelijc ghedaen, ende boosheyt bedreuen.

7

Ons vaderen in Egipten en hebben v wonderlijcheden niet verstaen, sij en hebben niet ghedachtich gheweest der menichten van uwer bermherticheden.

Ende si hebben v ghecreyt opclimmende in die zee, in die roode zee.

8

Ende hy heeftse verlost om sijnen naem, om dat hi sijn macht soude kenlijck maken.

9

Ende hy heeft die roode zee ghestraft, ende sij is drooghe gheworden, ende hy heeftse in die diepten gheleydt ghelijck in die woestijne.

10

Ende hy heeftse behouden wt die hant der gheender die hen haetten, ende verlost wt die hant des viants.

11

Ende het water heeft ouerdect die ghene die hen

[p. *479]

verdructen, daer en is niet een van dien ouerbleuen.

12

Ende sij hebben sijn woorden ghelooft, ende si hebben sijnen lof gheloeft.

13

Haestelijck hebben sijt ghedaen, sijn wercken hebben sij vergheten, ende sij en hebben sijnen raet niet ghehoorsaem gheweest.

14

Ende sij hebben welluste begheert in die woestijne, ende si hebben God ghetempteert in die dorre plaetse.

15

Hy heeft hen haer begheerte ghegheuen, ende versaetheyt in hen ziele ghesonden.

16

Ende sij hebben Moysen inden legher ghecreyt, Aaron des Heeren gheheylichden.

17

Die eerde is open ghedaen, ende sij heeft verslonden Dathan, ende sij ouerdecte op die vergaderinghe van Abiron.

18

Ende daer is een vier ontsteken in hen vergaderinge, die vlamme heeft die sondaers verbrant.

19

Ende sij hebben een calf ghemaect in Horeb, ende een ghesneden beelt aenbeden.

20

Ende sij hebben hen glorie verandert, in een ghelijckenisse van een hoy etende calf.

21

Sij hebben Godt vergheten die hen verlost heeft, die groote dinghen in Egipten ghedaen heeft,

22

wonderen in dlant van Cham, veruaerlijcke dinghen in die roode zee.

23

Ende hy heeft gheseyt dat hijse vernielen soude, en hadde Moyses sijn wtuercorene teghen den brueck niet ghestaen in sijn aensicht.

Om dat hy sijn gramscap afkeeren soude, dat hijse niet vernielen en soude,

24

ende sij hebben voor niet ghehadt dat begheerlijck lant.

Sij en hebben sijnen woorde niet ghelooft,

25

ende si hebben ghemurmureert in hen tabernakelen, sij en hebben des Heeren stemme niet verhoort.

26

Ende hy heeft sijn hant opghehauen op hen, dat hijse nederslaen soude in die woestijne.

27

Ende dat hy hen saet onder die natien der Heydenen soude nederworpen, ende hen verstroyen in die lantscappen.

28

Ende sij hebben die afgoderie van Beelphegor aenghenomen, ende sij hebben die sacrificien der dooden gheten.

29

Ende sij hebben hem ghecreyt in hen vonden, ende den val is in hen vermenichfuldicht.

30

Ende Phinees heeft ghestaen, ende die versoeninghe ghedaen, ende die plaghe is opghehouden.

31

Ende tis hem gherekent ter rechtuerdicheyt, van gheslachte tot gheslachte, tot inder eewicheyt toe.

32

Ende sij hebben hem ghecreyt aen die wateren des wedersegghens, ende Moyses was om haren wille ghequelt,

33

want sij verbitterden sijnen gheest.

Ende hy heeft ondersceyden met sijnen lippen,

34

sij en hebben die Heydenen niet vernielt van die welcke hen die Heere gheseyt hadde.

35

Ende sij sijn ghemenghelt onder die Heydenen, ende sij hebben hen wercken gheleert,

36

ende hebben ghedient haren ghesneden afgodts beelden, ende tis hen gheworden tot een verarghernisse.

37

Ende sij hebben hen sonen ende hen dochteren, den duyuelen gheoffert.

38

Ende sij hebben donnoosel bloet ghestort, dbloet van haren sonen ende haren dochteren, die sij gheoffert hebben den ghesneden beelden van Chanaan.

Ende die eerde is besmedt gheweest in hen bloet,

39

ende ontsuyuert in hen wercken, ende sij hebben onsuyuerheyt ghedaen in hen quade vonden.

40

Ende die Heere is met een rasende gramscap ghestoort gheweest op sijn volck, ende hy heeft een walghinghe van sijn erfdeel ghehadt.

41

Ende hi heeftse geleuert in die handen der Heydenen, ende sij hebben ouer hen heerschappie ghehadt die hen haetten.

42

Ende hen vianden hebben hen lijden aenghedaen, ende si sijn vernedert onder hen handen,

43

dicmael heeft hijse verlost. Maer sij hebben hen verbittert in haren raet, ende sijn vernedert in hen boosheden.

44

Ende hy heuet ghesien als sij verdruct worden, ende hy heeft hen ghebedt ghehoort.

45

Ende hy heeft sijns verbonts ghedachtich gheweest ende tis hem leedt gheweest na die menichfuldicheyt sijnder bermherticheyt.

46

Ende hy heeftse ghegheuen tot die bermherticheden, in daenschijn van allen den ghenen diese gheuanghen hadden.

47

Maect ons salich Heere onse Godt, ende verghadert ons van die natien.

Dat wij moghen belijden uwen heylighen naem, ende glorieren in uwen lof.

48

Ghebenedijt sij die Heere die Godt van Israhel van eewicheyt tot eewicheden, ende alle tvolc sal segghen, dat ghesciede, dat ghesciede.