Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.ij. Psalm.

Benedic anima mea.

1

GHebenedijt mijn ziele den Heere, ende alle dat binnen my is sijnen heylighen name.

[p. *477]

2

Ghebenedijt mijn ziele den Heere, ende en wilt niet vergheten alle sijn wederloonen.

3

Die ghenadich is allen uwen boosheden, die gheneest alle uwe siecheden.

4

Die vander doot v leuen verlost, die v croont met bermherticheyt ende ghenadicheden.

5

Die met goeden v begheerten veruult, v ioncheyt sal vernieuwt worden als des arents.

6

Die Heere bermherticheyt doende, ende ordeel alle den ghenen die onrecht lijden.

7

Heeft Moysi sijn weghen bekent ghemaect, den kinderen van Israel sijn belieften.

8

Die Heere is ghenadich ende ontfermende, lancmoedich ende seer bermhertich

9

Hy en sal inder eewicheyt niet gram sijn, noch tot allen tijden dreyghen.

10

Nae onsen sonden en heeft hy ons niet ghedaen, noch ons nae onse boosheden gheloont.

11

Want ghelijc die hoocheyt des hemels bouen die eerde is, soo heeft hy sijn bermherticheyt versterct ouer die ghene die hem vreesen.

12

Soo verre als dat oosten is vanden westen, soo verre heeft hy ons boosheden van ons ghedaen.

13

Ghelijck die vader ontfermt sijn kinderen, so heeft die Heere ontfermt der geender die hem vreesen,

14

want hy heeft ons maecsel bekent.

Hy is ghedachtich gheworden dat wij stubbe sijn,

15

eens menschen daghen sijn als hoy, ghelijc een bloeme des velts sal hy wtbloeyen.

16

Want den gheest sal in hem doorgaen, ende hy en sal niet blijuen staende, ende hy en sal niet meer sijn plaetse bekennen.

17

Maer die bermherticheyt des Heeren is vander eewicheyt tot inder eewicheyt, op die ghene die hem vreesen.

Ende sijn rechtuerdicheyt op die kinderen der kinderen,

18

den ghenen die sijn testament onderhouden.

Ende die ghedachtich sijn sijnder gheboden, om die te doen.

19

Die Heere heeft inden hemel sijnen stoel bereydt, ende sijn rijck sal ouer alle heerscappie hebben.

20

Ghebenedijt den Heere alle sijn engelen, machtich van crachte, doende sijn woort, om te hooren die stemme sijnder redenen.

21

Ghebenedijt den Heere alle sijn heyrcrachten, sijn dienaers die sijnen wille doet.

22

Ghebenedijt den Heere alle sijn wercken, in alle plaetsen van sijnder heerscappien ghebenedijt mijn ziele den Heere.