Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.i. Psalm.

Domine exaudi orationem.

1[2]

HEere verhoort mijn ghebedt, ende mijnen roep laet tot v comen.

2[3]

En keert v aensicht van my niet, in wat dach dat ick ghequelt worde soo neycht tot my v oore.

In wat dach dat ick v aenroepen sal, verhoort my haestelijck.

3[4]

Want mijn daghen sijn vergaen als eenen roock, ende mijn beenderen sijn als eenen verbranden roost verdorret.

4[5]

Ick ben gheslaghen als hoy, ende mijn herte is dorre gheworden, om dat ick vergheten hebbe mijn broot te eten.

5[6]

Van die stemme mijns suchtens, is mijn ghebeente aen mijn vleesch ghecleeft.

6[7]

Ick ben ghelijck worden den pellicaen der woestijnen, ick ben worden als een nachtraue int huys.

7[8]

Ick heb ghewaect ende ben gheworden als een mussche alleen woonende int dack

8[9]

Den gheheelen dach bescimpten my mijn vianden, ende die my presen swoeren teghen my.

9[10]

Om dat ick asschen als broot adt, ende mijnen dranc met weenen mengde.

10[11]

Van daensicht der verbolgentheyt van uwer gramscappen, want opheffende hebdi my ghestooten.

11[12]

Mijn daghen sijn als een scaduwe gheweken, ende ick ben als hoy dorre gheworden.

12[13]

Maer ghy Heere blijft inder eewicheyt, ende v ghedenckenisse van gheslachte tot gheslachte.

13[14]

Ghy Heere sult opstaende Sions ontfermen, want tis tijt haers te ontfermen, want den tijt is ghecomen.

14[15]

Want uwen dienaers hebben haer steenen behaecht, ende haerder eerden sullen sij ontfermen.

15[16]

Ende die Heydenen sullen uwen naem vreesen Heere, ende alle die coninghen van eertrijcke v glorie.

16[17]

Want die Heere heeft Sion opghetimmert, ende hy sal ghesien worden in sijn glorie.

17[18]

Hy heeft ghesien totten ghebede der ootmoediger, ende hy en heeft hen ghebedt niet versmaet.

18[19]

Laet dese dinghen scrijuen tot die ander gheboorte, ende tvolck dat gheschapen sal worden sal den Heere louen.

19[20]

Want hy heeft neder ghesien van sijn hooghe heylighe plaetse, die Heere heeft vanden hemel op die eerde ghesien.

20[21]

Om dat hy hooren soude dat suchten der gheuanghenen, dat hy ontbinden soude die kinderen vanden ghedoodden.

21[22]

Om dat sij vercondighen souden in Sion den naem des Heeren, ende sijnen lof in Ierusalem.

22[23]

Als die volcken versaemden in een, ende die coninghen om den Heere te dienen.

23[24]

Heeft hy hem gheantwoort inden wech sijnder cracht, die cortheyt mijnder daghen vercondicht my.

24[25]

En roept my niet wederom in die helicht mijnder daghen, van gheslachte tot gheslachte sijn v iaren.

25[26]

Van ierst hebdi Heere die eerde ghefundeert, ende uwer handen wercken sijn die hemelen.

26[27]

Sij sullen vergaen maer ghy blijft altijt, ende sij sullen alle ghelijck een cleedt verouderen.

Ende ghelijck een decsel cleedt suldise veranderen, ende sij sullen verandert worden,

27[28]

maer ghy sijt die selue, ende v iaren en sullen niet vergaen.

28[29]

Die kinderen uwer knechten sullen woonen, ende hen saet sal beclijuen inder eewicheyt.