Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C. Psalm

Misercordiam & iudicium.

1

BErmherticheyt ende ordeel, sal ick v singhen Heere.

Ick sal lof singhen,

2

ende verstaen inden ombesmetten wech, wanneer ghy tot my comen sult.

Ick doorwandelde in die onnooselheyt mijns herten, int midden van mijnen huyse.

3

Ick en stelde voor mijn ooghen gheen onrechtuerdighe sake, die ouertredinghen deden heb ick ghehaet.

4

My en heeft gheen arch herte aenghehanghen, den quaetwillighen van my afwijkende en kende ick niet.

5

Die sijnen naesten heymelijck lasterde, desen veruolchde ick.

Die hoouerdich van ooghen ende onuersadelijck van herten was, met dien en adt ick niet.

6

Mijn ooghen sijn tot die ghetrouwe der eerden, dat sij met my sitten souden, die inden ombesmetten wech wandelde dese diende my.

7

Hy en sal int midden mijns huys niet woonen die hoouerdicheyt doet, die boosheden spreect en heeft gheen voorspoet ghehadt int aenschouwen mijnder ooghen.

8

In die morghenstont doodde ick alle die sondaren der eerden, om dat ick vernielen soude van des Heeren stadt alle die quaet doen.