Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxxi. Psalm.

Deus stetit in Sinagoga.

1

GOdt heeft ghestaen in die Sinagoge der Goden, maer int midden ordeelt hy die Goden.

2

Hoe langhe ordeelt ghy onrecht, ende neemt wt die aensichten der sondaren.

3

Gheeft recht oordeel den behoeuighen ende die weese, ende doet rechtuerdicheyt den ootmoedighen ende den armen.

4

Verlost den armen, ende verlost den behoeuighen wt des sondaers handt.

5

Sij en hebben niet gheweten noch verstaen, in duysternissen wandelen sij, alle die fundamenten der eerden sullen beroert worden.

6

Ick heb gheseyt ghy sijt Goden, ende kinderen des hoochsten ghy allegader.

7

Maer ghy sult als menschen steruen, ende ghelijck een vanden princen suldi vallen.

8

Staet op God, ordeelt die eerde, want ghy sult alle die Heydenen tot erffenisse hebben.